Balaeva keler jyly MÁMS júıesinde ne ózgeretinin aıtty
ASTANA. KAZINFORM — 2026 jyldan bastap saqtandyrylǵan azamattar mindetti áleýmettik medıtsınalyq saqtandyrý (MÁMS) sheńberinde josparly medıtsınalyq qyzmetterdi ala alady. Bul júıe azamattardyń qarjylyq táýekelderin azaıtyp, densaýlyq saqtaý salasyn sapaly jańa deńgeıge kóterýge múmkindik beredi.
Bul týraly Premer-mınıstrdiń orynbasary — Mádenıet jáne aqparat mınıstri Aıda Balaeva málimdedi.
Onyń aıtýynsha, qazirgi tańda el boıynsha 17 mln adam, ıaǵnı halyqtyń 82 paıyzdan astamy MÁMS júıesinde saqtandyrylǵan.
— Onyń ishinde 12 mln-nan astam azamat jeńildigi bar sanatqa jatady. Al 4,5 mln-nan astamy jarnalardy ózderi tólep otyr. Bizdiń basty mindetimiz — saqtandyrylǵan azamattar sanyn odan ári arttyrý. Osy oraıda júıege áli kirmegen turǵyndardy MÁMS múmkindikterimen jan-jaqty tanysýǵa shaqyramyn, — dedi Aıda Balaeva.
Sondaı-aq mınıstr 2026 jyldan bastap MÁMS paketiniń aıtarlyqtaı keńeıetinin atap ótti. Jańa jyldan bastap oǵan qant dıabeti, balalar tserebraldy sal aýrýy, revmatızm jáne ózge de birqatar sozylmaly aýrýlar engiziledi.
— Bul sanattaǵy naýqastar dáriger konsýltatsııasyn, qajetti dári-dármekter men em-sharalardy tolyq kólemde mindetti medıtsınalyq saqtandyrý aıasynda ala alady. Sonymen qatar júıe keń taralǵan basqa da aýrýlardy emdeý men baqylaýdy óz moınyna alady. Máselen, búginde 1,5 mln qazaqstandyq arterııalyq gıpertenzııa dıagnozymen esepte tur. Jyl saıyn osy aýrýdyń asqynýynan 50 myńnan astam ınsýlt pen ınfarkt jaǵdaıy tirkeledi, — dedi mınıstr.
Aıda Balaevanyń aıtýynsha, 2026 jyldan bastap atalǵan naýqastarǵa kórsetiletin barlyq qajetti medıtsınalyq qyzmet medıtsınalyq saqtandyrý esebinen qamtamasyz etiledi. Budan bólek, baqylaý dıagnostıkasy, dári-dármekpen qamtamasyz etý, gemodıalız jáne búırek transplantatsııasy MÁMS paketi arqyly saqtandyrylǵan azamattarǵa qosymsha shyǵynsyz qoljetimdi bolady.
— Aldaǵy jyldan bastap qant dıabetimen aýyratyn azamattardyń emdelýi men dıspanserlik baqylaýy tolyqtaı mindetti medıtsınalyq saqtandyrý júıesine engiziledi. Barlyq josparly qabyldaý, qajetti zertteýler men dári-dármekter qosymsha tólemsiz kórsetiledi. Eń basty shart — naýqas mindetti medıtsınalyq saqtandyrý júıesinde saqtandyrylǵan bolýy kerek, — dep túıindedi Aıda Balaeva.
Buǵan deıin MÁMS boıynsha jeke klınıkalarda qandaı jaǵdaıda qaralýǵa bolatynyn jazǵanbyz.