Balaeva: Qazaqstanda teatr ónerine degen qyzyǵýshylyq artyp keledi
ASTANA. KAZINFORM — Búgin — Dúnıejúzilik teatr kúni. Sahna sańlaqtary úshin aıryqsha mánge ıe aıtýly data. Bul týraly QR Premer-mınıstriniń orynbasary — Mádenıet jáne aqparat mınıstri Aıda Balaeva aıtty.
Onyń sózinshe, teatr — tárbıe alańy, talǵamdy qalyptastyratyn, oı men sezimdi terbetetin, qoǵamǵa ózin jáne óz dáýirin tereńirek tanýǵa múmkindik beretin biregeı óner keńistigi.
— Memleket basshysy Qasym-Jomart Toqaev atap ótkendeı, teatrlardyń damýy — kez kelgen eldiń mádenı deńgeıiniń mańyzdy kórsetkishi. Búginde Qazaqstanda teatr ónerine degen qyzyǵýshylyqtyń artyp kele jatqany anyq baıqalady. Kórermen suranysy da barǵan saıyn mazmundy ári talapshyl sıpatqa ıe bolýda. Ásirese, sahna ónerine qushtar jandardyń arasynda jastardyń kóp bolýy kóńilge erekshe qýanysh uıalatady, — dedi Balaeva.
Mınıstr atap ótkendeı, búginde elimizde 70-ten astam teatr jumys isteıdi, olardyń 57-si — memlekettik.
— Tek 2025 jyldyń ózinde memlekettik teatrlarda 410 premera sahnalanyp, 539 gastroldik sapar uıymdastyryldy. Byltyr kórermender sany 2,8 mıllıonnan asty. Al, 2026 jyldyń alǵashqy toqsanynda respýblıkalyq teatrlar 170 myńnan astam kórermenge qyzmet kórsetti. Bul kórsetkishter teatrdyń elimizde suranysqa ıe, ómirsheń ári halyqqa jaqyn óner ekeniniń aıqyn dáleli, — deıdi ol.
Aıda Balaeva osy rette mádenıet pen tarıh máseleleriniń eldiń Ata Zańynda berik qundylyq retinde bekitilýi de erekshe mańyzǵa ıe ekenin alǵa tartty.
— Jańa Halyqtyq Konstıtýtsııada memlekettiń qyzmetiniń irgeli qaǵıdattarynyń qatarynda ulttyq mádenıetti qoldaý jáne tarıhı-mádenı murany saqtaý mindetteri aıqyn kórinis tapqan. Bul Qazaqstan úshin mádenıet qosalqy sala emes, qoǵamdyq damýdyń jáne ulttyq biregeıliktiń negizgi tirekteriniń biri ekenin kórsetetin mańyzdy baǵdar. Sonymen qatar Konstıtýtsııada tarıhı-mádenı muraǵa uqypty qaraý, tarıh pen mádenıet eskertkishterin saqtaý ár azamattyń mindeti retinde bekitilgen. Búginde qazaqstandyq teatrlar jańa qoıylymdarymen kórermendi qýanta otyryp, halyqaralyq sahnalarda el abyroıyn asqaqtatyp keledi. Olar túrli festıvalderge qatysyp, joǵary baǵalarǵa ıe bolyp, mádenı baılanystardy keńeıtýge óz úlesin qosýda. Osy aıtýly kúni teatr óneriniń barlyq ókilderin Dúnıejúzilik teatr kúnimen shyn júrekten quttyqtaımyn! Sizderge shalqar shabyt, shyǵarmashylyq tabys, óner jolynda jańa jetistikter tileımin! — dep túıindedi vedomstvo basshysy.
Osydan buryn Almatydaǵy N.Sats atyndaǵy teatrdy jańartýǵa taǵy 3,5 mlrd teńge bólingenin jazǵan edik.
