Balaeva Berdenovtiń keısi týraly: Anonımdi telegram arnalardyń jumysyn ashyqqa shyǵaramyz

ASTANA. KAZINFORM — Mádenıet jáne aqparat mınıstri Aıda Balaeva Úkimet otyrysynan keıin ótken baspasóz máslıhatynda Shymkent ákiminiń orynbasary Rýslan Berdenovtiń oqqa ushýyna qatysty pikir bildirdi.

— Men ózim mınıstr retinde telegram-kanaldardyń jumysyna úlken kóńil aýdarý kerek dep oılaımyn. Óıtkeni keshe de Shymkent ákiminiń orynbasaryna qatysty maǵlumattar sol anonımdi telegram-kanaldardan bastaldy da, ókinishke qaraı, bizdiń keıbir resmı BAQ aqparatty ilip áketti. Sondyqtan bul jerde jýrnalıstıkanyń negizgi prıntsıpterin buzbaýymyz kerek. Jalpy tergeý jumystary bitpeı jatyp, eshqandaı nátıjeni aıta almaımyz. Sodan keıin kúdiktiniń aty-jónin, sýretin kórsetkeni de úlken rezonans boldy, — dedi ol.

Mınıstrdiń paıymdaýynsha, oqıǵadan aqparat taratqan keıbir BAQ eki taraptyń da quqyǵyn buzǵan.

— Ekinshiden, Rýslan Berdenovtiń ózine de aqparat aıaýsyz bolyp ketti. Ákimshilikte jumys isteıtin áıel adamǵa qyryndady degen máseleler, ondaı aqparatty taratý, meniń oıymsha eshqandaı moralǵa syımaıdy. Tekserilmegen, naqtylanbaǵan aqparatty taratýǵa bolmaıdy. Meniń oıymsha, qazirgi aqparattyq jumysta anonımdi telegram-kanaldardyń jumysyn ashyq etýimiz kerek. «Kirsabyn» kanalymen jumystyń nátıjesi olardyń menshik ıelerin, olardy júrgizetin adamdardy tabýǵa bolatynyn kórsetti. Biz osy baǵytta jumys isteımiz, — dedi Aıda Balaeva.

Eske salsaq, eki kún buryn Shymkentte qala ákiminiń orynbasary Rýslan Berdenovke qastandyq jasalǵan edi. Kúdikti sheneýnikke qaraı úsh ret oq atqan. Oqıǵa saldarynan ákimdik qyzmetkeri jaraqat alyp, aýrýhanaǵa jetkizilgen.

Buǵan deıin sarapshy Berdenovke jasalǵan qastandyq oqıǵasyna toqtalyp, Shymkenttegi qylmystyń ósý sebepterin atady.