Balabaqshalarǵa 18 myń maman jetispeıdi – Smolıakova
ASTANA. KAZINFORM – Elimizde mektepke deıingi uıymdarda kadr tapshylyǵy baıqalady. Búginde balabaqshalarǵa 18 myń maman jetpeıdi, al 2030 jylǵa qaraı bul kórsetkish 20 myńǵa jetýi múmkin. Bul týraly Áleýmettik-mádenı damý komıtetiniń otyrysynda Parlament Májilisiniń depýtaty Ekaterına Smolıakova málimdedi.
Onyń aıtýynsha, salanyń sapasyna tárbıeshilerdiń tómen jalaqysy men qarjylandyrýdyń azdyǵy áser etip tur.
– Balabaqshalarǵa 18 myń maman jetpeıdi, al 2030 jylǵa qaraı bul kórsetkish 20 myńǵa jetýi múmkin. Eń qyzyǵy, balabaqshalarǵa maman aýadaı qajet bolyp jatqan tusta, memlekettik granttar sany kerisinshe azaıyp keledi. Mysaly, «Mektepke deıingi tárbıe» mamandyǵyna 2023 jyly 1382 grant bólinse, bıyl bul kórsetkish 738-ge deıin quldyraǵan. Onyń ústine, osy mamandyqty bitirgenderdiń tek 30 paıyzy ǵana óz kásibi boıynsha jumysqa qalady, – deıdi depýtat.
Sondaı-aq saýalnamaǵa qatysqandardyń 74 paıyzy sońǵy bes jylda balalardyń sóıleý tili men psıhıkalyq damýynyń kesheýildeýi (ZPR, ZRR) qatty kúsheıgenin aıtqan.
– Eger buǵan balabaqshada kóńil aýdarmasaq, saldaryn mektepte kóremiz. Inklıýzııa máselesi aldyńǵy qatarǵa shyǵyp tur. Mamandardyń paıymdaýynsha, balabaqshalar ınklıýzııaǵa tek 60 paıyzǵa ǵana daıyn. Bul jerde de súıemeldeý mamandarynyń tapshylyǵy, arnaıy jabdyqtaýdyń jetispeýshiligi sııaqty júıeli máseleler bar, – deıdi ol.
Aıta keteıik, Qazaqstanda balalardy qorǵaý baǵytyndaǵy bastamalar jaıly jazǵan edik.
