Balabaqshalardy vaýcherlik qarjylandyrý: pılottyq joba merzimi uzartyldy
ASTANA.KAZINFORM - Qazaqstanda vaýcherlik qarjylandyrý ádistemesin qoldana otyryp, mektepke deıingi tárbıe men oqytýǵa memlekettik tapsyrysty ornalastyrý boıynsha pılottyq jobanyń iske asý kezeńi 2026 jylǵy 1 shildege deıin jalǵastyrylady. Bul norma Qazaqstan Respýblıkasy Oqý-aǵartý mınıstrliginiń tıisti buıryǵymen bekitilgen.
Qujatqa engizilgen túzetýler mektepke deıingi tárbıe men oqytýǵa memlekettik bilim berý tapsyrysyn ornalastyrý qaǵıdalaryn jetildirýge baǵyttalǵan.
Vaýcherlik qarjylandyrý júıesiniń negizgi artyqshylyǵy - ata-analarǵa balabaqshany óz betinshe tańdaý múmkindigi berilýi. Bul jeke jáne memlekettik mektepke deıingi uıymdar arasynda durys básekelestikti qalyptastyrady, qarjylandyrý protsesin ashyq etedi, ıaǵnı «aqsha uıymǵa emes, balaǵa beriledi».
Jańa júıe balabaqsha kezegine turý rásimin jeńildetip, zańsyz faktorlardy boldyrmaıdy, sonymen qatar qyzmet kórsetý sapasyn arttyrýǵa múmkindik beredi.
Qazirgi ýaqytta pılottyq joba respýblıkanyń 20 qalasy men oblystardyń 23 aýdanynda engizilgen. 2025 jyldan bastap mektepke deıingi uıymdar kezeń-kezeńimen vaýcherlik qarjylandyrý júıesine kóshirilip jatyr.
Jobany iske asyrý tıimdiligi keshendi túrde taldanyp, nátıjeleri boıynsha mektepke deıingi bilim berý júıesin odan ári jetildirýge baǵyttalǵan usynystar ázirlenedi.
Aıta keteıik, elimizde 314 myń balaǵa qosymsha bilim alý boıynsha vaýcher berildi.
