Balabaqshalardaǵy kadr tapshylyǵy jalaqynyń tómendiginen - Sýhanberdıeva
ASTANA. QazAqparat - Balabaqshalardaǵy kadr tapshylyǵy jalaqynyń tómendiginen oryn alyp otyr. Bul týraly búgin Májiliste mektepke deıingi oqytý qyzmetiniń sapasy men qoljetimdiligin arttyrý taqyrybyndaǵy dóńgelek ústel otyrysynda QR Bilim jáne ǵylym vıtse-mınıstri Elmıra Sýhanberdıeva málim etti, dep habarlaıdy QazAqparat.
Vıtse-mınıstrdiń dereginshe, búginde elimizdiń mektepke deıingi uıymdarynda 84 myńnan astam pedagog eńbek etýde.
«Jyl saıyn bul mamandyqtarǵa memlekettik tapsyrys kólemi artyp kele jatyr. Degenmen, mektepke deıingi uıymdardaǵy kadr tapshylyǵy balabaqsha pedagogy mamandyǵynyń tartymsyzdyǵynan emes jalaqynyń tómendiginen oryn alyp otyr», - dedi ol.
Onyń aıtýynsha, búginde balabaqsha tárbıesiniń jalaqysy 35,7-55,6 myń teńge tóńireginde bolsa, al onyń kómeshisiniń aılyǵy ne bári 25-30 myń teńge ǵana bolyp otyr.
«Jalaqy balalardyń ómiri men densaýlyǵy úshin júkteletin jaýapkershilikpen múldem sáıkes kelmeıdi», - dedi Sýhanberdıeva.
Osy rette ol bul ahýaldy retteý úshin mektepke deıingi mekemelerdiń pedagogtarynyń júktemesin qaıta qarastyrý kerek degen oıyn jetkizdi.
«Mektep ustazdarynyń júktemesin qaıta qaraýda bizdi qoldaýlaryńyzdy ótinemiz», - dedi vıtse-mınıstr Májilis depýtattaryna.
