Balabaqshalarda pedagog-assıstent laýazymy paıda bolady

ASTANA. QazAqparat – Aldaǵy ýaqytta elimizdegi balabaqshalarda erekshe balalardy tárbıeleıtin jańa maman paıda bolady. Qazir ony engizý jaǵy qarastyrylyp jatyr. Bul týraly ortalyq kommýnıkatsııalar qyzmeti alańynda ótken baspasóz máslıhatynda aıtyldy, dep habarlaıdy QazAqparat tilshisi.

«Jergilikti atqarýshy organdardyń quzyretine qatysty erekshe bilim berý qajettilikteri bar balalardyń tárbıe-bilim alýyna jaǵdaı jasaý kerektigi jónindegi norma bar. Sondaı-aq, bilim berý uıymy basshylaryna qatysty jaýapkershilik kúsheıtildi. Olar erekshe balalardy talapqa saı jaǵdaımen qamtamasyz etýi tıis. Búginde mektepterge pedagog-assıstent laýazymy engizilgen. Qazirgi ýaqytta mektepterde 1000-ǵa jýyq pedagog-assıstentter jumys isteıdi. Endi mektepke deıingi uıymdarda pedagog-assıstent laýazymyn engizý josparlanýda», - dedi Oqý-aǵartý mınıstrligi arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵynyń dırektory Áıgerim Kúderınova.

Eske salaıyq, damý erekshelikteri bar oqýshylarǵa mektepke beıimdelýge kómektesetin mamandardy tartý byltyr qolǵa alynǵan edi.

Mınıstrlikten habarlaǵandaı, ótken jyly oqý jylynan bastap Qazaqstan mektepterinde 1 500-ge jýyq pedagog-assıstent jumysqa kiristi.