Balabaqshalarda oryn tapshylyǵy qysqaryp keledi
ASTANA. KAZINFORM – Bıyl balabaqsha kezegi 160 myńnan 23 myń orynǵa deıin qysqardy. Bul týraly Úkimet otyrysynda Oqý-aǵartý mınıstri Juldyz Súleımenova aıtty.
- Búgingi tańda elimizde 12 myńnan astam mektepke deıingi uıym jumys isteıdi. Olarda 1 mln-nan astam bala tárbıelenip jatyr. Onyń ishinde 360 myń bala mektepaldy daıarlyqtan ótti. 20 qalada jáne oblystardyń 23 aýdanynda vaýcherlik qarjylandyrý boıynsha pılottyq joba iske asyrylyp jatyr. Jobany iske asyrýda 1,1 mln vaýcher berildi, - dedi mınıstr.
Onyń aıtýynsha, atalǵan jumystyń nátıjesinde 2 jastan 6 jasqa deıingi balalardyń kezegi 160 myńnan 23 myńǵa deıin qysqartylyp, bıýdjet qarajatynyń 35,3 mlrd teńgesi únemdeldi.
- Balalardyń mamandyqtar týraly alǵashqy túsinikterin qalyptastyrý jáne eńbekke tárbıeleý maqsatynda 100 balabaqshada «Erte jastan eńbekke jáne kásipke baýlý» erte kásiptik baǵdarlaý ádisteri pılot negizinde júzege asyrylyp jatyr, - dedi Juldyz Súleımenova.
Aıta keteıik, Úkimet otyrysynda Mınıstrler kabınetiniń músheleri jańa oqý jylyna daıyndyq barysyn talqyǵa salyp jatyr.
