Balabaqshalarda 103 myń pedagog bar - mınıstrlik

ASTANA. KAZINFORM — Balabaqshalarda qyzmet etip júrgen pedagogterdiń basym bóligi memlekettik mektepke deıingi uıymdarda qamtylǵan. Bul týraly QR Oqý-aǵartý birinshi vıtse-mınıstri Maıra Meldebekova aıtty.

- Óńirlerde jańa oryndardy ashý jáne olardy ári qaraı qarjylandyrý úshin respýblıkalyq bıýdjetten 2023 jyly 203 mlrd teńge, 2024 jyly 226 mlrd teńge, 2025 jyly 252 mlrd teńge jalpy sıpattaǵy transfertter bólindi. 2023 jyldan Memleket basshysynyń tapsyrmasyna sáıkes, halyqtyń áleýmettik osal tobyna jatatyn (HÁOT) otbasy balalaryn mektepke deıingi uıymdarda tegin tamaqtandyrý qamtamasyz etildi. Bıyl mektepke deıingi uıymdarda 67 200 bala tegin tamaqpen qamtyldy, - dedi M. Meldebekova Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, Qazaqstannyń mektepke deıingi bilim berý uıymdarynda 103 myń pedagog qyzmet etedi. Sonyń 60 myńy memlekettik, al qalǵan 43 myńy jekemenshik mektepke deıingi uıymdarda jumyspen qamtylǵan.

- 2019 jyldan bastap balabaqshalarda jumys isteıtin pedagogterdiń jalaqysy 130 paıyzǵa artty. Sondaı-aq 41 myńǵa jýyq pedagogke biliktilik sanaty úshin laýazymdyq jalaqysyna 30-50 paıyz aralyǵynda qosymsha ústemeaqy tólenedi. Sońǵy úsh jylda jańa attestattaý júıesi boıynsha biliktilik sanaty bar pedagogter úlesi 43-ten 47 paıyzǵa ósti, - dedi vıtse-mınıstr.

Budan buryn habarlanǵandaı, keıingi 5 jylda elimizdegi mektepke deıingi uıymdardyń sany 10 650-den 12 myńǵa (11 909) jýyqtady.