Balabaqshalar qurylysynda bızneske jaǵdaı jasaý qajet - Memleket basshysy
ASTANA. Sáýirdiń 2-si. QazAqparat /Rýslan Ǵabbasov/ - Balabaqshalar qurylysynda bızneske jaǵdaı jasap, jer telimderin bólý kerek. Bul týraly búgin Astanada elordanyń aldaǵy damýy máselelerine arnalǵan sáýlet-qurylys keńesinde Elbasy Nursultan Nazarbaev málim etti,
dep habarlaıdy QazAqparat.
«Adamı kapıtaldy qalyptastyrý óte mańyzdy. Sondyqtan sońǵy keńeste Úkimetke, ákimderge balabaqsha problemalaryn túbegeıli sheshýdi tapsyrǵan edim. Bilemin, bul baǵytta tıisti jumystar atqarylyp jatyr», dep atap ótti Prezıdent.
Búgingi keńes barysynda «Balapan» baǵdarlamasynyń oryndalýy barysy talqylanatynyn jetkizgen Memleket basshysy, «Osy turǵyda mende bir eskertý bar. Barlyǵyn bıýdjetke, memleketke arqalaýdyń qajeti joq. Bul bıznestiń isi. Atap aıtqanda, bul qyzyq jobalar», dedi N. Nazarbaev.
Sondyqtan bul baǵytta tıisti jaǵdaı jasap, shaǵyn jáne orta bıznesti jumyldyrý jumystaryndaǵy kemshilikterdi synǵa alǵan Prezıdent, « bul qurylystardy salatyndardy túrli salyqtardan bosatyp, oǵan tıisti múmkindik jasap, jer telimderin bólý kerek. Atap aıtqanda, olar quratyn jumys oryndarynyń ózin úlken is dep baǵalaý qajet», dedi.
