Balabaqshaǵa úsh jyldan artyq barǵan balanyń úlgerimi qatarlastarynan basym bolady - Ashat Aımaǵambetov

NUR-SULTAN. QazAqparat - Oqý-aǵartý mınıstri Ashat Aımaǵambetov mektepke deıingi kezeńde balany erte daıyndaý men damytýdyń mańyzdylyǵy týraly oıymen bólisti, dep habarlaıdy QazAqparat.

Mınıstrdiń paıymynsha, erte damýdyń mańyzdy ekenin eleýsiz qaldyrýǵa bolmaıdy. Balanyń mıy tez damyp, negizgi daǵdylar men minez-qulyq qasıetteri qalyptasady, sonymen qatar ol balanyń densaýlyǵyna negiz bolady. Mektepke deıingi mekemege barý balanyń boıynda ózin-ózi retteý, jańa ortaǵa beıimdelý jáne topta jumys isteý sııaqty birqatar paıdaly mashyǵyn damytýǵa kómektesedi.

Ashat Qanatuly osy mashyqtyń barlyǵy balanyń mektepte úlken jetistikke jetýine yqpal etetini dáleldengen erte oqytý ádebıetine sholýdy usynǵan.

«Halyqaralyq zertteýlerdiń nátıjeleri balabaqshaǵa barǵan jáne erte jastan jazý men sanaýdy úırengen balalar mektepte úlgerimi boıynsha óz qatarlastarynan basym bolatynyn kórsetedi. Mysaly, PISA-2018 derekteri boıynsha úsh jyldan astam balabaqshaǵa barǵan oqýshylar mektepke deıingi uıymdarǵa barmaǵandarǵa qaraǵanda joǵary nátıje kórsetedi: oqý saýattylyǵy boıynsha 20 upaıǵa jáne matematıka men jaratylystaný saýattylyǵy boıynsha 16 upaıǵa.

Sonymen qatar TIMSS zertteýiniń nátıjeleri de balabaqshaǵa barǵan oqýshylardyń jaqsy nátıje kórsetkenin dáleldedi. Mysaly, balabaqshaǵa barmaǵan 4-synyp oqýshylary men oǵan úsh jyldan astam barǵandar arasyndaǵy aıyrmashylyq matematıkadan 16 ball, al jaratylystaný páni boıynsha balabaqshaǵa barǵandarda 23 ball boldy. Al ata-analary mektepke deıin jazýdy, oqýdy jáne sanaýdy úıretken 4-synyp oqýshylary ata-analary anda-sanda ǵana oqýyna kóńil bólgen balalarǵa qaraǵanda matematıkadan 15 upaıǵa jáne jaratylystaný páninen 25 upaıǵa joǵary alǵan», - dep jazdy mınıstr.

Erte damytý men mektepke deıingi bilim berýmen qamtý elimizdiń ekonomıkalyq kórsetkishterine áseri jaǵynan da mańyzdy.

Nobel syılyǵynyń laýreaty D. Hekmannyń áleýmettik osal otbasylardan shyqqan balalardyń mektepke deıingi bilimine jumsalǵan bir dollardyń ekonomıkalyq qaıtarymy týraly tujyrymdary keń taralǵan. Ol memleketke 8 (6) dollar paıda ákeledi.

Zertteýlerge sáıkes, bolashaqta balanyń kórsetkishterine áser etetin mańyzdy krıterıı - ol mektepke deıingi uıymnyń sapasy.

«ıAǵnı mektepke deıingi kezeńdegi balanyń jaǵdaıy men bilim berýdiń keıingi kezeńderinde damýy úshin onyń erte jastan damýyna nazar aýdarý mańyzdy ekenin kórip otyrmyz», - dep túıindeıdi Ashat Aımaǵambetov.