Balabaqshaǵa kezekke turǵyzý tolyǵymen elektrondy formatqa aýysady - Saǵadıev
ASTANA. QazAqparat - Balabaqshaǵa kezekke turǵyzýdy tolyǵymen elektrondy formatqa aýystyrý jumysy jyl sońyna deıin aıaqtalady. Bul týraly búgingi Úkimet otyrysynda QR Bilim jáne ǵylym mınıstri Erlan Saǵadıev aıtty, dep habarlaıdy QazAqparat tilshisi.
«Jańa oqý jylynda 900 myńǵa jýyq bala baratyn 10300 mektepke deıingi bilim berý uıymy jumys isteıdi. Bul salada memlekettik-jekeshelik áriptestik eń jaqsy damyǵan. Olardyń úlesi balabaqshalardyń 37 paıyzyn quraıdy. Bul ótken jylmen salystyrǵanda 6 paıyzǵa artyq. Tek sońǵy alty aıdyń ishinde jańa 40 myń oryn ashyldy. Onyń 31 myńy jekemenshik. Nátıjesinde 3-6 jastaǵy balalardy balabaqshamen qamtý 93 paıyzǵa jetti», - deıdi mınıstr.
Onyń aıtýynsha, «Balapan» baǵdarlamasy arqyly balabaqshadaǵy jalpy oryn sany halyqtyń suranysynan asyp ketken.
«Biraq, bul jalpy respýblıka boıynsha aımaqtarda dısbalans saqtalyp otyr. Ol aımaqtardaǵy jumys deńgeıi men mıgratsııaǵa baılanysty. Іri qalalarda, ásirese Almaty men Astana qalalarynda jetispeýshilik bar. Endigi mańyzdy jumys - balabaqshaǵa kezekke turý jáne joldama berýdi tolyǵymen elektrondy formatqa aýystyrý. Sonda kezek jarııa túrde jáne tez jyljıtyn bolady. Bul jumys osy jyldyń aıaǵyna deıin barlyq oblystarda aıaqtalýy tıis», - deıdi ol.
Erlan Saǵadıev jańa oqý jylyna daıyndyq barysynda ákimdikterdiń bıýdjeti arqyly 99 balabaqshaǵa kúrdeli jóndeý júrgizilip jatqanyn aıtady. Onyń 72-i aıaqtalyp qoıǵan. 31 tamyzǵa deıin qalǵan balabaqshalardyń barlyǵyn jóndeý jumystary sońyna jetkizilmek. Jalpy, jergilikti bıýdjet qarjysy esebinen kúrdeli jáne aǵymdaǵy jóndeýge balabaqshalarǵa 1 mlrd 300 mln teńge qarajat kózdelgen. Mınıstrdiń sózine sensek, ákimdikterdiń aqparatyna sáıkes, balabaqshalar jańa oqý jylyna daıyn.
