Balabaqshaǵa ketken búldirshin aýyr dene jaraqatymen aýrýhanaǵa tústi
TÚRKІSTAN. QazAqparat - Túrkistan oblysy Otyrar aýdanynda balabaqshaǵa ketken búldirshin aýyr dene jaraqatymen aýrýhanadan bir-aq shyqty. Bir jastan endi ǵana asqan balany ata-anasy tańǵy saǵat segizde balabaqshanyń tasymal kóligine salyp jibergenin aıtady, dep habarlaıdy QazAqparat tilshisi.
Búldirshinniń anasy Ajar Pernebektiń aıtýynsha, arada úsh saǵat ótken soń oǵan balabaqshadan jaısyz habar jetken. Tárbıeshi balasynyń jaı ǵana qulap, jaraqattanyp qalǵanyn aıtady. Alaıda, balabaqshaǵa barǵan ol ulynyń jambasy synyp, basy men denesi qatty jaraqattanǵanyn kóredi. Baqshadaǵylardyń jedel járdem de shaqyrtpaǵanyna qynjylady. Esesine, jambasy isip, qınalyp turǵan balany emshige aparyp úlgeripti. Bolǵan jaıt týraly tárbıeshiler eki túrli jaýap berip, áldeneni jasyryp otyr deıdi.
«Balamnyń aıaǵy mashınada qaıyrylyp, qysylyp qaldy deıdi. Sol kezde qulap qalǵanyn aıtady. Bizdiń oıymyzsha, onyń aıaǵy rasymen qysylyp qalǵan jáne kólik júrip ketken. Qulaǵan soń kórinbeı qalady ǵoı. Júrgizýshi tústi dep oılaǵan da, súıregen biraz jerge deıin. Basynda úsh jerden gematoma. Bet-aýzy qan josa, syrylǵan túgel. Sol jaq jambasy isip ketken jáne salbyrap tur», - deıdi anasy.
Sonymen, tańǵy saǵat toǵyzda jaraqattanǵan sábı oblystyq balalar aýrýhanasyna keshki altyda jetkiziledi. Tez arada ota jasalyp, synǵan jambasyna temir salynǵan. Dárigerler jaǵdaıyn ortasha aýyr dep baǵalady. Endi 4 aıdan soń jambasyndaǵy temirdi alý úshin qaıta bir operatsııa jasalady.
Anasy balabaqshanyń basshylyǵy men tárbıeshilerin de, kólik júrgizýshisin de sotqa bermek. Al, aýdandyq bilim bólimindegiler bala kólikten túskennen keıin baıqaýsyzda qulap qalǵan deıdi.
«Bala «Folksvagen Opel» markaly jeńil avtokóliginen túsip, tárbıeshisine qaraı júgirgen kezde tasqa súrinip qulaǵan. Sonyń saldarynan beti men bas terisi syrylǵan, aıaǵynyń san súıegi synǵan. «Bolashaq» balabaqshasynyń meńgerýshisinen habarlamany ýaqytly bermegeni úshin túsinikteme alynyp, jaýapkershiligi qaralyp jatyr», - deıdi Otyrar aýdandyq adamı áleýetti damytý bóliminiń basshysy Janat Musataeva.
Aýdandyq polıtsııa bólimi oqıǵanyń mán-jaıyn anyqtaýǵa kiristi. Sondaı-aq, QR QK 345-baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» boıynsha jeńil kóliktiń júrgizýshisine qatysty sotqa deıingi tergep-tekserýdi bastady.
Eske sala keteıik, astanada múgedek balalardy uryp-soqqan tárbıeshiniń ústinen qylmystyq is qozǵalǵan edi.
