Balabaqshaǵa qabyldaý úshin qandaı qujattar qajet
ASTANA. KAZINFORM — Astanada jańa oqý jylyna balabaqshaǵa qabyldaý qarsańynda ata-analar qajetti qujattardy aldyn ala ázirlep qoıǵany jón.
Bul týraly qalalyq Ortalyq kommýnıkatsııalar qyzmetinde ótken baspasóz máslıhatynda Astana qalasy Bilim basqarmasy basshysynyń orynbasary Marjangúl Qaıyrbaeva málim etti.
Onyń aıtýynsha, balany mektepke deıingi uıymǵa qabyldaý úshin birqatar mindetti qujat tapsyrylady.
— Atap aıtqanda, 3×4 kólemindegi fotosýret, № 065/ý nysanyndaǵy profılaktıkalyq ekpe kartasy, № 052-2/ý nysanyndaǵy balanyń densaýlyq pasporty jáne № 027/ý nysanyndaǵy medıtsınalyq anyqtama qajet. Medıtsınalyq qujattar Qazaqstan Respýblıkasy Densaýlyq saqtaý mınıstrliginiń №QR DSM-175/2020 buıryǵyna saı rásimdelýi tıis, — dedi Marjangúl Qaıyrbaeva.
Spıkerdiń aıtýynsha, qabyldaý barysynda týyndaıtyn suraqtar boıynsha ata-analar memlekettik mektepke deıingi uıymdardyń konsýltatsııalyq pýnktterine júgine alady.
— Mamandardyń baılanys derekteri Astana qalasy Bilim basqarmasynyń resmı saıtyndaǵy «Qyzmeti → Mektepke deıingi tárbıe men oqytý» bóliminde jáne Indigo24.kz portalyndaǵy «Paıdaly aqparat» bóliminde jarııalanǵan, — dedi ol.
Sondaı-aq Bilim basqarmasynyń Mektepke deıingi tárbıe jáne oqytý bólimi dúısenbiden jumaǵa deıin saǵat 07:30–dan 17:00–ge deıin ata-analarǵa keńes beredi. Túski úzilis — 12:00–den 13:30–ǵa deıin.
Qosymsha aqparat alý úshin 8 (7172) 55-68-64, 55-72-49, 55-74-36 jáne 55-68-74 telefon nómirlerine habarlasýǵa bolady.
Aıta keteıik, Astanada 2026–2027 oqý jylyna balabaqshaǵa joldama berý 1 shildeden bastalady.
