Balabaqshadan oryn alyp beremin deıtin alaıaqtar kóbeıdi – Oqý-aǵartý mınıstri
ASTANA. KAZINFORM – Áleýmettik jeliler men messendjerlerde ata-analarǵa aqshalaı syıaqy úshin balasyn balabaqshaǵa kezeksiz ornalastyryp berýdi ýáde etken zańsyz habarlandyrýlar qaptap ketti. Oqý-aǵartý vıtse-mınıstri Shynar Aqparova Májiliste ótken brıfıngte mundaı usynystardyń alaıaqtyq ekenin aıtyp, ata-analardy saq bolýǵa shaqyrdy.
Vıtse-mınıstrdiń aıtýynsha, qazir balabaqsha kezegi tolyqtaı tsıfrlandyrylǵan. Júıe elektrondy bolǵandyqtan, ony syrttaı aınalyp ótý nemese protsesti jasandy túrde jedeldetý múmkin emes. Ótinishti de bógde adamdar emes, tek balanyń zańdy ókilderi óz attarynan joldaı alady.
– Balany balabaqshaǵa ornalastyrǵysy keletin ata-ana óziniń JSN-i men ETsQ kilti arqyly ǵana ótinish berip, balany kezekke qoıa alady. Sondyqtan eshqandaı zańsyz shemalarǵa oryn joq, al mundaı áreketter úshin el zańnamasynda qatań jaýapkershilik qaralǵan, – dedi Shynar Aqparova.
Vedomstvo ókili kezeksiz oryn alyp berý týraly qaýesetterge senbeýdi jáne bári zań sheńberinde, óz retimen ǵana sheshiletinin aıtty.
– Barlyq ata-analarǵa aıtarym – mundaı zańsyzdyqqa jol berilmeıdi. Bizde bári tek qalyptasqan kezek boıynsha júredi. Platforma arqyly balabaqshalarǵa kezekke turý protsesi bar. Sondyqtan mundaı qaýesetterge ermeý kerek, mindetti túrde ózderińiz jeke kabınet arqyly ótinish berip, óz kezegińizdi kútýińiz qajet, – dedi vıtse-mınıstr.
Aıta keteıik, elimizde mektepke deıingi bilim berýdi jan basyna shaqqandaǵy vaýcherlik qarjylandyrý boıynsha pılottyq joba 2026 jyldyń 1 shildesine deıin uzartylǵan bolatyn.
