«Balabaqshadan oryn alyp beremin»: 30-dan astam ata-anany aldaǵan alaıaq ustaldy
ASTANA. KAZINFORM — Astanada turǵyn balasyn balabaqshaǵa ornalastyrýǵa úmittengen ondaǵan ata-anany aldap, olardyń aqshasyn ıemdengen.
Ol óz qurbandaryn 2GIS mobıldi qosymshasyndaǵy «Pikirler» bóliminen tapqan, onda ata-analar balalaryn memlekettik mektepke deıingi uıymdarǵa qabyldaýǵa kómektesý týraly ótinish qaldyrǵan. Osyndaı habarlamalardy kórip, ol ata-analarmen baılanysqa shyǵyp, ózin «deldal» retinde tanystyryp, syıaqy úshin «Indigo24.kz» júıesi arqyly balabaqshaǵa ornalastyrýǵa kómektesetinin aıtqan.
Qarajatty alǵan soń, jasyrynǵan.
Astana qalasynyń prokýratýrasy málimetinshe, 30-dan astam alaıaqtyq faktisi anyqtalyp, keltirilgen jalpy shyǵyn 1 mln teńgeden asqany belgili boldy.
Memlekettik aıyptaýshy onyń kinásin tolyq dáleldedi.
Sotta áıel óz kinásin moıyndap, ókinetinin bildirdi jáne jábirlenýshilerge keltirilgen shyǵyndardy jartylaı qaıtardy, qalǵan shyǵyn odan óndirildi. Jeńildetetin mán-jaılardy eskere otyryp, sot oǵan 4 jyl merzimge probatsııalyq baqylaýmen bostandyqty shekteý jazasyn taǵaıyndady.
Úkim zańdy kúshine endi.
Prokýratýra - jeke derekterdi ashyq derekkózderde, ásirese pikirlerde jarııalaý aıtarlyqtaı qaýip týdyrý múmkindigi jóninde eskertedi. Messendjerler men áleýmettik jelilerdegi beıtanys adamdardyń usynystaryna senbeńizder.
Barlyq memlekettik qyzmet, sonyń ishinde balabaqshaǵa kezekke turý tek resmı tsıfrlyq platformalar arqyly júzege asyrylady.
Aıta keteıik, balabaqshalar men kolledjderde jan basyna shaqqandaǵy qarjylandyrý ózgeredi.