Balabaqshadaǵy ýlaný oqıǵasy: Balalardyń dıagnozy anyqtaldy
ASTANA. QazAqparat - Elordadaǵy №36 balabaqshanyń balalary aýrýhanaǵa ótkir ishek ınfektsııasymen túsken. Bul týraly Astana qalasynyń densaýlyq saqtaý basqarmasynyń basshysy Kamaljan Nadyrov Astanada ótken brıfıngte aıtty, dep habarlaıdy «QazAqparat» HAA tilshisi.
«Tańerteń balalarǵa arnalǵan ınfektsııalyq aýrýhanaǵa ótkir ishek ınfektsııasy dıagnozymen alty bala, al eresekterge arnalǵan ınfektsııalyq aýrýhanaǵa dál osy dıagnozben tárbıeleýshi tústi. Olardyń jaǵdaıy ortasha dárejede. Polıklınıkanyń aýmaǵynda osy ınfektsııa juǵýy múmkin sol toptaǵy 15 bala tekserilip jatyr. Olardy turaqty túrde baqylaýdamyz», - deıdi ol.
Onyń aıtýynsha, aýrýdyń mundaı túri ár túrli jaǵdaıda juǵýy múmkin. Ádette mundaı dıagnozben túsken emdelýshiler bir aptadan keıin jazylyp, úıine qaıtyp jatady.
«Aýrýdyń qalaı juqqanyn Astana qalasynyń qoǵamdyq densaýlyq saqtaý departamentinen suraý kerek. Olar qazir qajetti sharalardy júrgizip jatyr. Tekseristen keıin tıisti sharalar qolǵa alynady», - deıdi ol.
Eske sala ketsek, buǵan deıin Astana qalasynyń ákimdigi bul másele boıynsha tergeý júrgizilip jatqanyn habarlaǵan bolatyn.
7 aqpan kúni atalmysh balabaqshadaǵy joǵary toptyń toǵyz balasy qusyp, olardan dıareıa men temperatýranyń bary anyqtalǵan. Sonymen birge, balabaqshanyń tárbıeleýshisi de aýyryp qalǵan. Qazirgi ýaqytta aýrýhanada alty bala, bir tárbıeleýshi men bir kútýshi emdelip jatyr.
