Balabaqshadaǵy taqpaqtan romandarǵa deıin ádildikti nasıhattaýy kerek — Rınat Zaıytov

ASTANA. KAZINFORM — Búgin Parlament Májilisiniń otyrysynda depýtat Rınat Zaıytov úsh jyl ishinde júzege asqan saıası reformalardyń aralyq qorytyndylaryna toqtaldy.

Onyń aıtýynsha, elimizde úlken jetistikterge qaraı nyq qadam jasalyp keledi. Bul, eń aldymen, Memleket basshysy Qasym-Jomart Toqaevtyń saıası ınstıtýttarǵa jáne halyqtyń únin jetkizetin azamattarǵa artqan seniminiń nátıjesi.

— Qazaq úshin qashannan beri eldiń amanaty men seniminen aýyr júk joq. «Dóp» bassań — el úmitin aqtaǵan ersiń, «qalt» bassań — jaýdan beter ezsiń! Keıde tipti kótergen suraǵyńa orynsyz syn taǵyp, «Osy másele sender qozǵaıtyn taqyryp pa? Nege joǵarydaǵylar usaq-túıek máseleler qozǵaıdy» dep jatady. Óz basym bul synmen kelispeımin. Sebebi biz — bir memleketpiz, — dedi R. Zaıytov.

Depýtat Májiliste apta saıyn halyq qalaýlylarynyń úkimet múshelerine saýal joldap, ótkir suraqtar qoıyp otyrǵanyn aıtty.

Onyń pikirinshe, Májiliste qoǵam belsendileri men sarapshylardyń qatysýymen eldi tolǵandyratyn máseleler ashyq ári búkpesiz talqylanyp keledi. Bul úrdis halyqtyń bılikke degen senimin qaıta tiriltýge yqpal etip otyr.

— Osylaısha, qoǵamdy tolǵandyratyn kóptegen másele sheshimin taýyp, eldiń irgesi bekı tústi. Árbir ıgi is júzege asqan saıyn halyqtyń bılikke degen senimi artyp keledi, — dedi Rınat Zaıtov.

Sonymen qatar depýtat qoǵamdaǵy rýhanı daǵdarys máselesine de toqtaldy. Ol rýhanı tozýdyń, qatygezdiktiń artqanyn atap ótip, buǵan turmystyq qıyndyqtar, tárbıeniń álsireýi jáne áleýmettik jelidegi teris aqparattar yqpal etip otyrǵanyn aıtty. Bul rette tárbıe jumysyn kúsheıtýdi, jas urpaqtyń boıyna meıirim, ádilettilik pen memleketshildikti nasıhattaıtyn kontentti damytý qajettigine toqtaldy.

— Tárbıe tal besikten degendeı, Qazaqstandaǵy mýltfılmnen kınoǵa, balabaqshadaǵy taqpaqtan romandarǵa deıin adamdardyń boıyndaǵy meıirim men baýyrmaldyqty, memleketshildik pen ádildikti nasıhattaýy kerek. Sonda ǵana biz Qazaq memleketiniń baıraǵyn qulatpaı, mártebesin asqaqtatatyn urpaq ósire alamyz. Qazaq memleketiniń materıaldyq emes qundylyqtaryn qaıta túgendep, ony jastardyń sanasyna sińirý — bizdiń mindetimiz, — dep qorytyndylady ol.

Budan buryn habarlanǵandaı, búgin Parlament Májilisiniń jalpy otyrysynda palata tóraǵasy Erlan Qoshanov «Prezıdent Qasym-Jomart Toqaevtyń saıası reformalaryn iske asyrý — memlekettik qurylystyń jańa tarıhı kezeńi» atty baıandama jasady. 

Otyrys barysynda elimizdiń barlyq progressıvti qoǵamdyq-saıası kúshterin Memleket basshysynyń tóńireginde toptasýǵa jáne Ádiletti Qazaqstan qurý qaǵıdattaryna negizdelgen rezolıýtsııa (qarar) qabyldandy.