Balabaqshada balalarǵa qol kótergen tárbıeshi habarsyz ketti
TALDYQORǴAN. QazAqparat - Almaty oblysyndaǵy Іle aýdanynyń Baıserke aýylyndaǵy «Nıet-aı» jeke menshik balabaqshasynda tárbıelenýshilerge qol kótergen maman joǵalyp ketti. Balalarǵa qatygezdik tanytqan tárbıeshiniń áreketi áleýmettik jelige taraǵannan keıin ol jumysqa kelmeı, uıaly telefonyna da jaýap bermeı jatyr, dep habarlaıdy QazAqparat tilshisi.
«Balalarǵa qatygezdik tanytqan maman 5 tamyzda atalǵan jeke menshik balabaqshaǵa tárbıeshiniń kómekshisi bolyp jumysqa ornalasqan. Oǵan óziniń múmkindikterin kórsetý úshin bir aı synaq merzimi berilgen. Al 13 tamyzda Ekaterına esimdi ana eki balasyn osy balabaqshaǵa alǵash ornalastyrǵan. Dál sol kúni tárbıeshi jańadan kelgen balaǵa qol kótergen. Bólmedegi baqylaý kameralaryndaǵy jazbalar qaralyp, mán-jaı anyqtalǵannan keıin jańadan ornalasqan maman keshirim suraǵan. Biraq onyń áreketi áleýmettik jelige tarap ketkennen keıin tárbıeshi jumysqa kelmeı, uıaly telefonyna jaýap bermeı jatyr. Qazir Іle aýdandyq bilim bólimi balalardy urǵan tárbıeshini jumystan shyǵarý jóninde balabaqshaǵa usynys jiberdi. Al balalardyń ata-anasy prokýratýraǵa aryz túsirdi. Naqty qandaı sheshim qabyldanatynyn osy quzyrly organ sheshedi»,- Іle aýdany ákiminiń baspasóz hatshysy Baqtııar Talǵatuly.
Esterińizge sala keteıik, áleýmettik jelide balany urǵan tárbıeshiniń vıdeosy jarııalanǵanyn habarlaǵan bolatynbyz. Beınejazbada belgisiz áıel uıyqtap jatqan balany mazalap, beti men jambas tusynan urǵany anyq kórinedi. Artynsha, ata-ana balabaqshada búldirshindi urǵan tárbıeshiniń ústinen polıtsııaǵa aryz túsirdi.
«Balanyń ata-anasy Іle aýdandyq polıtsııasyna tárbıeshiniń ústinen aryz túsirdi. Tártip saqshylar qajetti saraptamany taǵaıyndady. Soǵan sáıkes, protsessýaldyq sheshim qabyldanatyn bolady», - delingen atalǵan vedomstvonyń taratqan aqparatynda.
Aıta keteıik, shilde aıynda Taldyqorǵandaǵy jeke menshik balabaqshada osyǵan uqsas jaǵdaı bolǵan. Búldirshinderge qol kótergen tárbıeshiniń ústinen QR QK 141-babyna sáıkes qylmystyq tergeý bastaldy.
