Balabaqshada 3-4 jasar búldirshinderdi sabaq emes, oıyn arqyly damytý ádisi engiziledi

ASTANA. QazAqparat – Elimizde balany erte damytýdyń jańa ádis-tásili iske qosyldy. Bul týraly QR Oqý-aǵartý mınıstri Ǵanı Beısembaev málim etti, dep habarlaıdy QazAqparat tilshisi.

«Úzdiksiz bilim berýdiń eń mańyzdy deńgeıi – balabaqshadaǵy tárbıeleý men oqytý. Zertteýlerge sáıkes, balanyń ıntellektýaldy, áleýmettik, emotsıonaldyq, fızıologııalyq damýyna balabaqshalardyń tıgizetin áseri orasan. Sol sebepti balalardy erte damytýdyń jańa modeli engizildi», - dedi Ǵanı Beısembaev atalǵan vedomstvonyń keńeıtilgen otyrysynda.

Mınıstrdiń aıtýynsha, jańa modeldi engizý jolynda oqý baǵdarlama, jospary men oqytý ádisteri qaıta qarastyryldy.

«Osyǵan deıin baǵdarlama tym akademııalyq kúrdeli edi, ol - 3-4 jasar balalardy otyrǵyzyp, 20 mınýttan sabaq berý bolsa, endigi kezekte halyqaralyq tájirıbe eskerilip, tárbıe men oqytý balalardyń jas ereksheligine sáıkes balabaqsha tabaldyryǵynan bastalady. Oıyn – balanyń jany men tánine saı keletin tabıǵı áreket. Bala sol arqyly qorshaǵan álemdi zerttep, ony tanı otyryp, qajetti daǵdylaryn damytady», - deıdi ol.

Sondaı-aq, vedomstvo basshysy balanyń tutas damýy úshin barlyq jaǵdaı jasalýy kerektigin aıtty.

«Jańa modeldegi ustanym balalardy kommýnıkatıvti, ózine senimdi, tózimdi, deni saý, ashyq jáne kreatıvti oılaýǵa baǵyttaıdy. Sonymen qatar eńbekqorlyq pen bilimge qushtarlyq qundylyqtaryn boıyna balabaqshadan bastap sińirýdi kózdeıdi», - dedi Ǵ.Beısembaev.