Balabaqsha vaýcherin ýaqytynda rastamaǵandar kezekten aıyrylýy múmkin
ASTANA. KAZINFORM — Astanada balabaqshadaǵy bos oryndar aldymen kútý tiziminde turǵan balalarǵa beriledi. Al vaýcherdi belgilengen merzimde rastamaǵan ata-analar kezekten shyǵyp, belgili bir ýaqytqa deıin jańa vaýcher ala almaıdy.
Bul týraly Ortalyq kommýnıkatsııalar qyzmetinde ótken baspasóz máslıhatynda Astana qalasy Bilim basqarmasy basshysynyń orynbasary Marjangúl Qaıyrbaeva aıtty.
Onyń aıtýynsha, qoldanystaǵy tártipke saı, balabaqshada bos oryn paıda bolǵan kezde júıe kezekte birinshi turǵan ata-anaǵa avtomatty túrde habarlama jiberedi.
— Eger ata-ana bir kún ishinde jaýap bermese, onyń ótinishi kútý tiziminen alynyp, habarlama kelesi kezektegi ótinish ıesine joldanady. Ótinish belsendi bolsa, barlyq habarlama ED24.kz mobıldi qosymshasyna jáne «INDIGO — elektrondy balabaqsha» júıesindegi jeke kabınetke túsedi, — dedi Marjangúl Qaıyrbaeva.
Spıkerdiń sózinshe, vaýcher de aqparattyq júıe arqyly avtomatty túrde beriledi.
— Vaýcher kezekte birinshi turǵan ótinish ıesine usynylady. Habarlama alǵannan keıin eki jumys kúni ishinde vaýcherdi paıdalanýǵa kelisim berý nemese odan bas tartý qajet. Eger ata-ana bas tartsa, kezegi joıylady. Al belgilengen merzimde jaýap berilmese, ótinish belsendi emes kúıge aýysyp, 28 kún boıy vaýcher alý úderisine qatystyrylmaıdy, — dedi ol.
Ol vaýcherler tolyqtaı aqparattyq júıe arqyly beriletinin atap ótti.
— Bilim basqarmasy da, mektepke deıingi uıymdar da vaýcher berý kezegine yqpal ete almaıdy. Sondyqtan ata-analar kezek tártibin saqtap, júıeden keletin habarlamalardy ýaqytynda baqylap otyrǵany jón, — dedi basqarma basshysynyń orynbasary.
Aıta keteıik, Astanada 2026–2027 oqý jylyna balabaqshaǵa joldama berý 1 shildeden bastalady.
