Balabaqsha vaýcherleri arqyly únemdelgen 35 mlrd teńge qaıda jumsaldy — mınıstrlik jaýaby
ASTANA. KAZINFORM — Qazaqstanda balabaqshalardy vaýcherlik qarjylandyrý pılottyq jobasyn iske asyrý nátıjesinde 35 mlrd teńgeden astam qarajat únemdeldi. Bul týraly Kazinform agenttiginiń saýalyna QR Oqý-aǵartý mınıstrligi Mektepke deıingi bilim berý departamentiniń dırektory Gúlnara Iskakova málimdedi.
Mınıstrlik málimetinshe, qarajat paıdalanylmaǵan jáne qabyldanbaǵan vaýcherlerge, sondaı-aq tekserý kezinde joıylǵan vaýcherlerge tólem jasalmaýy esebinen únemdelgen.
— Únemdelgen qarajat bıýdjetke qaıtarylǵan joq. Ol vaýcherlik qarjylandyrý aıasynda jańa vaýcherler berýge, ıaǵnı oǵan naqty qajettiligi bar balalardy qarjylandyrýǵa baǵyttaldy, — dedi spıker.
Vaýcherlik júıede balabaqshaǵa tólem balanyń mektepke deıingi uıymǵa naqty barǵany ata-ana tarapynan rastalǵannan keıin júrgiziledi. Al málimetterdiń durystyǵyn tekserý jáne yqtımal zań buzýshylyqtardy anyqtaý úshin táýekelderdi basqarý júıesi qoldanylady. Tekserý toqsanyna bir ret júrgizilip, jalǵan kontıngent pen fıktıvti jazbalardy anyqtaýǵa múmkindik beredi.
Qazir vaýcherlik qarjylandyrý pıloty 20 qala men 23 aýdandaǵy shamamen 6 myń mektepke deıingi uıymda iske asyrylyp jatyr. Joba aıasynda 1,2 mln-nan astam vaýcher berilgen.
Aıta keteıik, buǵan deıin vaýcherlik júıeniń arqasynda balabaqsha kezegi 85%-dan astamǵa qysqarǵany habarlandy.
