Balabaqsha tárbıeshisi áriptesiniń atyna 4 ret nesıe rásimdegen
NUR-SULTAN. QazAqparat – Elordadaǵy balabaqshalardyń birinde tárbıeshi bolyp jumys isteıtin 26 jastaǵy qyz áriptesin aldaý arqyly atyna 4 ret nesıe resimdegen. Bul týraly QazAqparat tilshisi Nur-Sultan qalasy polıtsııa departamentiniń baspasóz qyzmetine silteme jasap habarlaıdy.
Tergeý barysynda 26 jastaǵy qyz óz áriptesiniń atyna mıkrokredıttik uıymdardan 4 ret qaryz resimdep, onyń bank kartasynyń nómirin kórsetkeni belgili boldy. Ol óz kartasy buǵattalǵandyqtan, aqshasyn ala almaı júrgenin aıtyp, áriptesine bank kartasyndaǵy derekterdi aıtýǵa kóndiredi. Karta ıesi shotqa kelip túsken nesıeni jaı ǵana aýdarym eken degen oımen qyzǵa sheship berip otyrǵan.
«Tergeý barysynda kúdiktiniń qylmysty aldyn ala josparlaǵany anyqtaldy. Áriptesiniń jeke bas derekterin sómkesindegi qujattardy sýretke túsirý arqyly alyp otyrǵan. Qazir kúdiktiniń ústinen «Alaıaqtyq» baby boıynsha qylmystyq is qozǵaldy. Aıta ketý kerek, qyz buryn osyndaı qylmys úshin qylmystyq jaýapkershilikke tartylǵan», - delingen departamenttiń málimetinde.
