Balabaqsha men mektepterge arnalǵan aqparattyq ónimniń mazmuny men bezendirilýi qadaǵalanatyn bolady - A. Smaıyl
ASTANA. 18 jeltoqsan. QazAqparat - Balabaqsha men mektepterge arnalǵan aqparattyq ónimniń mazmuny men bezendirilýi qadaǵalanatyn bolady. Búgin Parlament Májilisiniń jalpy otyrysynda palata depýtattary «Balalardy densaýlyǵy men damýyna zııan tıgizetin aqparattan qorǵaý týraly» zań jobasy boıynsha baıandama jasaǵan depýtat Aldan Smaıyl osylaı málim etti.
«Zań jobasyndaǵy ereksheliktiń biri balalarǵa arnalǵan aqparattyń jekelegen túrlerin taratýǵa qoıylatyn qosymsha talaptar jeke bap retinde engizilip otyr. Osy bapqa sáıkes, endi mektepke deıingi balalar uıymdarynda balalardy oqytý jáne tárbıeleý úshin paıdalanatyn aqparattyq ónimniń mazmuny men bezendirilýi qadaǵalanatyn bolady. Dál osyndaı baqylaý bilim berý júıesinde de iske asady», deıdi A. Smaıyl. Depýtattyń aıtýynsha, qujattaǵy súbeli úlesterdiń biri aqparattyq ónimge saraptama jasalady. Atap aıtqanda, aqparattyq ónimge saraptama júrgizý quqyna ıe bolatyn sarapshylar men saraptama uıymdaryn ýákiletti organnyń janynan qurylatyn komıssııa júzege asyratyn bolady.
«Zań jobasyna sáıkes, shet elderden de, ishten de satyp alynatyn aqparattyq baǵdarlamalar jas sanattaryna sáıkes tańbalanyp kelýge tıis. Tańbalanýy talap etiletin fılmder men baǵdarlamalardyń qataryna endi balalarǵa arnalǵan aqparattyq ónimder de engizilip otyr», dedi depýtat.
