Balabaqsha kúzetshisi 30-dan astam adamdy órtep jiberdi
ASTANA. QazAqparat - Brazılııanyń Mınas-Jeraıs shtatyndaǵy balabaqshalardyń birinde jantúrshigerlik oqıǵa boldy.
Balabaqshaǵa kúzetshi órt qoıyp, saldarynan alty bala, bir tárbıeshi qaza tapqan, taǵy ondaǵan adam aýyr jaraqattanǵan, dep habarlaıdy Globo TV.
Oqıǵa 5 qazan, beısenbi kúni Janaýba qalasynda bolǵan. Telearnanyń resmı saıtyndaǵy málimetterge qaraǵanda kúzetshi,50 jastaǵy Damıao Soares dýsh Santýsh óziniń jáne balalardyń ústine benzın quıyp, artynan órtep jibergen.
Tórt jastaǵy tórt bala oqıǵa ornynda qaza tapqan, taǵy eki bala men 43 jastaǵy tárbıeshi aýrýhanada jan tapsyrǵan. Kúzetshiniń ózi de túgel janyp ketken.
Órt sóndirýshiler aýrýhanaǵa jetkizilgen 24 adamnyń 21-i búldirshinder ekenin málimdedi. Al jergilikti BAQ-tyń habarlaýynsha, qaıǵyly oqıǵadan jalpy 45 adam zardap shekken.
Kúzetshiniń sońǵy segiz jyl boıy sol balabaqshada jumys istep kelgeni belgili boldy, ol psıhıkalyq aýytqýǵa shaldyqqan bolýy múmkin degen joramaldar bar.
Qaıǵyly oqıǵaǵa baılanysty jergilikti bılik jeti kúndik qaraly kún jarııalady.
