Balabaqsha kezegi 85%-dan astam qysqardy — Oqý-aǵartý mınıstrligi
ASTANA. KAZINFORM — Qazaqstanda 2-6 jastaǵy balalardyń balabaqsha kezegi 160 myńnan 23 myńǵa deıin qysqardy. Bul týraly Kazinform agenttiginiń saýalyna QR Oqý-aǵartý mınıstrligi Mektepke deıingi bilim berý departamentiniń dırektory Gúlnara Iskakova málimdedi.
Mınıstrlik málimetinshe, mundaı nátıjege vaýcherlik qarjylandyrý tetigin engizý arqyly qol jetkizilgen.
— Jańa mehanızmdi engizý nátıjesinde 2-6 jastaǵy balalardyń balabaqsha kezegi 160 myńnan 23 myńǵa deıin qysqaryp, 85,6%-ǵa tómendedi, — dedi departament dırektory.
Vaýcherlik qarjylandyrý Qazaqstanda 2024 jyldan bastap kezeń-kezeńimen engizilip keledi. Júıe «aqsha balanyń sońynan eredi» qaǵıdatyna negizdelgen jáne ata-analarǵa mektepke deıingi uıymdy óz betinshe tańdaýǵa múmkindik beredi. Pılottyq joba barysynda balabaqshany erkin tańdaý, kútý paraǵy, balanyń naqty qatysýyna qaraı qarjylandyrý jáne málimetterdiń durystyǵyn tekseretin táýekelderdi basqarý júıesi engizilgen.
Qazir pılottyq joba 20 qala men 23 aýdandaǵy shamamen 6 myń mektepke deıingi uıymda iske asyrylyp jatyr. Osy ýaqytqa deıin 1,2 mln-nan astam vaýcher berilgen.
Aıta keteıik, buǵan deıin 2027 jyldyń sońyna deıin taǵy 68,2 myń balabaqsha orny ashylatyny habarlandy.
