Balabaqsha kezegi 160 myńnan 23 myńǵa deıin qysqardy
ASTANA. KAZINFORM – Elimizde vaýcherlik qarjylandyrý nátıjesinde 2 jastan 6 jasqa deıingi balalardyń balabaqsha kezegi 160 myńnan 23 myńǵa deıin qysqardy. Bul týraly QR Oqý-aǵartý birinshi vıtse-mınıstri Shynar Aqparova málimdedi.
Ortalyq kommýnıkatsııalar qyzmetinde ótken baspasóz konferentsııasynda ol elimizde vaýcherlik qarjylandyrý boıynsha pılottyq joba 20 qala men oblystardyń 23 aýdanynda júzege asyrylyp jatqanyn aıtty.
– Joba aıasynda 1,1 mln vaýcher berildi. Sonyń nátıjesinde 2 jastan 6 jasqa deıingi balalardyń kezegi 160 myńnan 23 myńǵa deıin qysqaryp, bıýdjet qarajatynyń 35,3 mlrd teńgesi únemdeldi, – dedi Shynar Aqparova.
Búginde elimizde 12 myńnan astam mektepke deıingi uıym jumys isteıdi. Olarda 1 mıllıonnan astam bala tárbıelenip jatyr. Onyń ishinde 360 myń bala mektepaldy daıarlyqtan ótken. Atap aıtqanda, 193 myń bala mektepke deıingi uıymdarda, 167 myń bala mektepterdiń mektepaldy synyptarynda daıarlanǵan.
Aıta keteıik, buǵan deıin býllıngke tosqaýyl qoıý maqsatynda jańa oqý jylynda qandaı qosymsha tetikter engiziletinin jazǵanbyz.
