Balabaqsha býhgalteri men sharýashylyq meńgerýshisi 53 mln teńgeden astam bıýdjet qarajatyn jymqyrǵan

PAVLODAR. KAZINFORM — Pavlodarda balabaqsha býhgalteri men sharýashylyq meńgerýshisi sóz baılasyp, birneshe jyl qatarynan bıýdjet qarajatyn jymqyryp kelgen. Sot olardy 7 jylǵa bas bostandyǵynan aıyrdy.

Pavlodar qalasynyń № 2 sotynda 53 mln teńgeden astam bıýdjet qarajatyn jymqyrǵan balabaqsha býhgalteri men sharýashylyq meńgerýshisiniń isi qaraldy.

Belgili bolǵandaı, 2022 jyldyń qańtarynan bastap 2024 jyldyń naýryzyna deıingi kezeńde «Pavlodar qalasyndaǵy № 4 bóbekjaı-baqshasy» MQKK býhgalteri B.A. atalǵan mekemeniń sharýashylyq meńgerýshisi B.J.-men aldyn ala sóz baılasyp, óz shottaryna zańsyz aqsha aýdarý jolymen bıýdjet qarajatyn jymqyrǵan. Ekeýi jalpy somasy 41 mıllıon teńgeden astam mólsherde materıaldyq zalal keltirgen.

«Býhgalter munymen toqtamaı, osyǵan uqsas qylmystyq shemany paıdalanyp, 2023 jyldyń qyrkúıegi men 2024 jyldyń mamyry aralyǵynda «Pavlodar qalasynyń № 7 bóbekjaı-baqshasy» MQKK-nyń býhgalteri bolyp qyzmet atqaryp, jalpy somasy 5 mıllıon teńgeden astam bıýdjet qarajatyn jymqyrǵan. Sondaı-aq, Aqqýly aýdanyndaǵy «Qyzǵaldaq» bóbekjaı-baqshasynda qashyqtan býhgalter bolyp jumys isteı júrip, 2023 jyldyń jeltoqsany men 2024 jyldyń mamyry aralyǵynda jalpy somasy 7 mıllıon teńgeden astam bıýdjet qarajatyn qoldy qylǵan», -dep habarlady Pavlodar qalasy № 2 sotynyń baspasóz qyzmetinen.

Sot jazany jeńildetetin mán-jaılardy — kinásin tolyq moıyndaýdy, shyn júrekten ókinýdi, keltirilgen zııandy ishinara óteýdi, B.A.-nyń bes jas balasynyń bolýyn eskere otyryp, árqaısysyna 7 jyl merzimge bas bostandyǵynan aıyrý túrindegi jazany taǵaıyndady. Sondaı-aq B.A.-ny memlekettik uıymdarda 5 jyl merzimge býhgalterlik qyzmetpen aınalysý quqyǵynan, al B.J.-ny 5 jyl merzimge memlekettik uıymdarda qarjylyq jaýapkershilikke baılanysty laýazymdardy atqarý quqyǵynan aıyrdy.

Úkim zańdy kúshine engen joq.

Eske sala keteıik, elorda soty Maıqaıyńdaǵy qutqarýshylardyń ólimine jumys berýshi tarap kináli dep tanydy.