Bala zábir kórgen: Oralda balabaqsha qyzmetkeri jumysynan bosatyldy

ORAL. KAZINFORM — Oral qalasynda áleýmettik jelide balabaqsha qyzmetkerleri tarapynan balasynyń zábir kórgeni jóninde ata-ana shaǵymy jarııalandy. Balanyń anasy Ranıda Eralıevanyń Kazinform tilshisine málim etkenindeı, bastapqyda balabaqsha qyzmetkerleri máseleni joqqa shyǵarǵanymen, beınejazbadan barlyǵy kórinip tur.

Onyń sózine qaraǵanda, ákimshi basqa qyzmetkerlerdiń kózinshe balaǵa aıqaılap, ony kereýetke laqtyrǵan. Sodan keıin kereýetten julyp alyp, edenge tastaǵan. Sosyn kamera ornatylmaǵan jertólege alyp ketken. Balanyń jylap, «aýyrady» dep aıtqany estilip tur. Keri ákelgende de, jylaǵan búldirshindi eshkim tynyshtandyrmaǵan.

— Bul bir ǵana kúnniń beınejazbasy. Basqa kúnderdiń beınejazbasyn suraǵanda, qyzmetkerler joq dep aıtty. Shyn mánisinde beınejazba 30-40 kún saqtalýy kerek. Balamnyń qyrkúıek aıy boıy zábir kórgendikten, qorqyp barǵysy kelmegeni endi túsinikti boldy. Barlyq kinálilerdi qylmystyq jáne ákimshilik jaýapkershilikke tartýdy talap etemiz, — dedi R. Eralıeva.

Onyń aıtýynsha, psıhıkasy buzylǵan bala qazir aýyryp júr. Medıtsınalyq anyqtamada oń jaq shyntaǵy men sol jambasynda teriasty kógergen jer bar ekeni kórsetilgen. «Montekids» jeke balabaqshasyna ata-analar aıyna 120 myń teńgeden tóleıdi.

Oral qalasy bilim berý bóliminen alynǵan málimetke qaraǵanda, ata-ananyń shaǵymy negizinde І.Esenberlın kóshesi 10/1-mekenjaıyndaǵy «Montekids» balabaqshasynda ishki qyzmettik tekserý júrgizilip, beınejazbalar qaralǵan.

— Nátıjesinde balabaqsha ákimshisi tarapynan balaǵa qatysty orynsyz qarym-qatynas faktisi anyqtaldy. Barlyq beınejazbalar men materıaldar tıisti tergeý organdaryna joldandy. Qazirgi tańda ákimshi qyzmetinen shettetilip, tárbıeshi jumystan bosatyldy. 2025 jylǵy 28 qazanda bóbekjaı ata-analarynyń resmı ótinishi negizinde jınalys ótkizildi. Sonyń nátıjesinde ata-analarǵa onlaın baqylaý júıesine qoljetimdilik qamtamasyz etildi. Bóbekjaıdaǵy jaǵdaıdy jan-jaqty zerdeleý úshin Oral qalasy bilim berý bólimi janynan arnaıy komıssııa qurylyp, qosymsha tekserý júrgizilýde, — delingen resmı jaýapta.

BQO boıynsha bala quqyǵy jónindegi ýákil Shattyq Ótebalıeva máseleniń baqylaýda ekendigin jetkizdi.

— Qazirgi ýaqytta tergeý amaldary júrgizilip, barlyq mán-jaı zerttelip jatyr. Onyń nátıjeleri boıynsha protsessýaldyq sheshim qabyldanyp, qoldanystaǵy zańnama aıasynda jaýapkershilik dárejesi aıqyndalady. QR Qylmystyq is júrgizý kodeksiniń 201-babyna sáıkes, bul jóninde tolyǵyraq aqparat berý múmkin emes, — dedi Sh.Ótebalıeva.

Eske sala keteıik, budan buryn BQO-da bilim salasynyń 40-qa jýyq qyzmetkeri jaýapqa tartylǵanyn jazǵan bolatynbyz.