Bala vagonnyń astyna ózi tústi - Pavlodardaǵy tramvaı júrgizýshisi
PAVLODAR. QazAqparat - Tramvaı júrgizýshisi keshe keshkisin Pavlodarda tramvaıdyń balany basyp ketýine baılanysty túsinik berdi. Júrgizýshi balanyń vagonnyń astyna ózi kelip túskenin aıtady, dep habarlaıdy «QazAqparat» HAA tilshisi.
«21-i kúni men 62-vagonda besinshi baǵyt boıynsha jumys istedim. Qaıyrbaev qıylysynan ótip, vokzal jaqqa bet aldym. Alaıda, Lermontov kóshesindegi aıaldamaǵa jete bergende, jol jıeginde bir balanyń turǵanyn baıqadym. Men birneshe ret tejegishti basyp, dybysty sıgnal berdim. Biraq bala múlde elemedi. Oǵan jaqyndaı bergende turǵan turysy júgirip ketkeli turǵandaı kórindi. Men birden shuǵyl tejegishti bastym, vagonnyń múmkindigi jetken barlyq toqtatý amaldaryn jasadym. Shuǵyl tejegishti basý kezinde bala maǵan qaraı júgirip, vagon astyna qaraı sekirdi... Osynyń bárin men óz kózimmen kórip turdym», - dedi tramvaı júrgizýshisi Balzada Raısova.
«Dereý jedel járdem jáne polıtsııa shaqyrdyq. Men júgirip, qońyraý shalyp júrgende jolaýshylar arasynda bolǵan burynǵy TJM qyzmetkeri balany shyǵarýǵa kómektesti. Ol esin bilip jatty, biraq sóıleı almady», - dedi B.Raısova.
Júrgizýshi bolǵan oqıǵadan keıin qanynda alkogol bar-joǵyn anyqtaıtyn saraptamadan ótip, polıtsııa bólimshesinde túsinikteme bergenin aıtty.
