Bala úshin «Álippemen» árip taný tıimdi - Ashat Aımaǵambetov
«Álippege qatysty sheshim qabyldadyq. Ony biz aıtqan edik. Bul óte mańyzdy másele. Birinshiden, memlekettik standartqa engizildi. Ol ádilet organdarynda tirkeldi. Qazir baǵdarlamany daıyndap, bekitýge ázirmiz. Bul baǵdarlama eń bastysy Ahmet Baıtursynov ádistemesi negizinde bolady. Biraq, ádistemeniń negizinde degen sol jyldardaǵy áriptermen, tek qana sol negizde bolady degen sóz emes. Eń bastysy - ádistemesi. Osy ádistemeniń negizinde qazaq tiliniń ózine tán qasıetterin bile otyryp baǵdarlama daıyndaý mańyzdy bolyp otyr», - dedi mınıstr Ortalyq kommýnıkatsııalar qyzmetindegi baspasóz máslıhatynda BAQ ókilderiniń saýalyna oraı.
Onyń atap ótýinshe, atalǵan baǵdarlama engizilgennen keıin 1-synyp oqýshylary 1 jáne 2-toqsanda Álippeni oqıdy. Al 3 jáne 4-toqsanda Ana tilimen bilim alady.
«Bul óte mańyzdy. Sondyqtan tek qana formaldy jaǵynan emes, eń bastysy mazmuny jaǵynan qaraǵanda da balalar úshin tıimdi bolady. Óıtkeni, balalar kele sala daıyn turǵan mátindi oqymaýy tıis. Balalar 1-synypqa ártúrli deńgeımen keledi», - dedi Ashat Aımaǵambetov.
