Bala urlaǵan Temirtaý turǵyny jeti jylǵa bas bostandyǵynan aıyryldy
QARAǴANDY. QazAqparat - Eki jastaǵy kishkentaı qyzdy urlap áketý týraly atyshýly iske qatysty sot úkimi shyqty. Temirtaýdaǵy bala kútýshisi jeti jylǵa bas bostandyǵynan aıyryldy, dep habarlaıdy «QazAqparat» HAA tilshisi.
Temirtaý memlekettik sotynyń tóreshisi Talǵat Eleýov «Tańsholpan» balalar úıiniń túlegi, 22 jastaǵy bala kútýshisin Qylmystyq kodekstiń «adam urlaý» jónindegi 125 baby boıynsha kináli dep tanydy.
«Sottalýshy jeti jylǵa bas bostandyǵynan aıyrylyp, jazasyn orta dárejeli qaýipsizdik mekemesinde óteıdi», - dep habarlady Temirtaý memlekettik soty keńsesi.
Sottalýshy sot zalynda qyzdyń anasynan birneshe ret keshirim suraǵanymen, áıel onymen bitimge kelýden bas tartty.
Aıta keteıik, 26 naýryz kúni keshkisin Temirtaý qalasynyń 22 jasar turǵyny bala kútýshisiniń 2 jastaǵy qyzyn urlap ketkendigin málimdep, polıtsııa qyzmetine júgingen bolatyn.
