Bala týýǵa baılanysty memqyzmetter bank qosymshalarynda qoljetimdi bolady

NUR-SULTAN. QazAqparat – Bala týýmen baılanysty memqyzmetter bank qosymshalarynda qoljetimdi bolady. Bul týraly QR Eńbek jáne halyqty áleýmettik qorǵaý mınıstri Serik Shápkenov Úkimet otyrysynda málim etti, dep habarlaıdy QazAqparat tilshisi.

«Byltyr aǵymdaǵy bıznes-protsesterge júrgizilgen taldaý nátıjesinde memlekettik qyzmetterdiń damýyn tejeıtin birqatar faktorlar anyqtaldy. Atap aıtqanda, zeınetaqy men járdemaqy taǵaıyndaý úshin qajetti «tarıhı» derekterdiń bolmaýy, mobıldi azamattar bazasynda tirkeýdiń bolmaýy. Osyǵan baılanysty biz memlekettik qyzmet kórsetý úderisterin reınjınırıng jáne transformatsııalaý boıynsha jumys júrgizýdemiz.

Búgingi kúni elektrondyq formatta 45 memlekettik qyzmettiń 42 túri nemese 93% usynylady, onyń ishinde 21 qyzmetti nemese 43% proaktıvti túrde alýǵa bolady», - dedi Serik Shápkenov.

Onyń aıtýyna qaraǵanda, 2021 jyly áleýmettik-eńbek salasynda barlyǵy 12,6 mln memlekettik qyzmet kórsetilgen. Onyń ishinde 9,1 mln nemese 72% qyzmet elektrondy túrde kórsetildi.

«Bul 2020 jylmen salystyrǵanda 12% artyq. 2025 jylǵa qaraı biz barlyq memlekettik qyzmetterdi 100% elektrondy formatqa kóshirýdi josparladyq», – dedi Serik Shápkenov.

Sondaı-aq, mınıstr, halyqtyń qyzmet alý múmkindikterin keńeıtý úshin byltyr qazan aıynda eki bankpen birlesip, olardyń platformalarynda bala týýmen baılanysty memlekettik qyzmetter servısin iske qosqanyn atady.

«Tek 2021 jyldyń tórtinshi toqsanynda balalary bar 16,5 myńnan astam otbasy úıde otyryp, ekinshi deńgeıli baknterdiń mobıldi qosymshalary arqyly qyzmet aldy. Osy praktıkany basqa bankterdiń mobıldi qosymshalary arqyly engizý jónindegi jumys jalǵasatyn bolady», - dedi Serik Shápkenov.