Bala týýǵa baılanysty járdemaqyny eń kóp rásimdeıtin óńirler belgili boldy
ASTANA. KAZINFORM – «Azamattarǵa arnalǵan úkimet» memlekettik korporatsııasy bala týýǵa baılanysty járdemaqyny rásimdeý boıynsha kósh bastap turǵan óńirlerdiń reıtıngin jarııalady.
Bul qyzmetke eń kóp júgingen óńir – Túrkistan oblysy.
– Bıyl Túrkistan oblysynda bala týýǵa baılanysty járdemaqy 17 424 ret rásimdelgen, – delingen habarlamada.
Ekinshi orynda Almaty qalasy tur. Munda atalǵan memlekettik qyzmetti 11 624 azamat alǵan.
Al úzdik úshtikti 10 723 rásimdelgen ótinimmen Astana qalasy túıindeıdi.
Reıtıngtiń tórtinshi jáne besinshi oryndaryna Almaty oblysy men Shymkent qalasy jaıǵasty.
Atap aıtqanda, Almaty oblysynda - 10 369, al Shymkent qalasynda 10 037 járdemaqy rásimdelgen.
– Árbir rásimdelgen qujat – elimizdiń bir azamaty jáne otbasy men balaǵa kórsetiletin memlekettik qoldaýdyń mańyzdy qadamy, – dep atap ótti «Azamattarǵa arnalǵan úkimet» memlekettik korporatsııasy.
Vedomstvo ókilderiniń aıtýynsha, bala týýǵa baılanysty járdemaqyny rásimdeý qyzmeti azamattar arasynda eń suranysqa ıe áleýmettik qyzmetterdiń biri bolyp sanalady.
Aıta keteıik, Astanada jazǵy demalyspen 242 myńnan astam bala qamtylady.
