Bala Turkvizyon ulttyq irikteý kezeńiniń aqtyq synyna qatysýshylar anyqtaldy (FOTO)
ASTANA. QazAqparat - Elordadaǵy Beıbitshilik jáne kelisim saraıynda 19 qyrkúıekte bolǵan án baıqaýynyń jartylaı fınaldyq básekesinde Bala Turkvizyon ulttyq irikteý kezeńiniń aqtyq synyna qatysýshylar anyqtaldy.
Kórermenderdiń daýys berýi men qazylar alqasynyń ortaq sheshimi arqyly 8 ónerpaz fınalǵa joldama aldy. Bul án alamanyn ónersúıer qaýym «Habar» arnasynyń tikeleı efırinen tamashalady. Bul keshte talapkerlerdiń barlyǵy jańa án oryndap shyqty.
Esterińizde bolsa, belgili óner sheberleri jartylaı fınalǵa qatysýshylardy maýsym men tamyz aılarynyń aralyǵynda iriktegen. Sóıtip olar jeke-jeke órenderdiń talabyn qomdap, shabytyn shyńdaý arqyly búgingi saıysqa daıyndady.
Ulttyq irikteý kezeńin Álııa Nazarbaevanyń «Jandaný álemi» qory uıymdastyrdy. Al bas aqparattyq demeýshi retinde «Habar» agenttigi qoldaý kórsetti.
Bala Turkvizyon ulttyq irikteý kezeńiniń aqtyq syny erteń saǵat 16.00-da bastalady.
Aıta keteıik, erteń kórermender men qazylar anyqtaıtyn eń úzdik ónerli óren jeltoqsan aıynda Túrkııanyń Stambul qalasynda ótetin Bala Turkvizyon baıqaýyna qatysady.
