«Bala Turkvizyon-Qazaqstan» baıqaýynyń ulttyq irikteýinde elorda namysyn qorǵaıtyn ónerpaz anyqtaldy

ASTANA. QazAqparat - Elordalyq 8-13 jas aralyǵyndaǵy júzden asa ónerpaz M.Ótemisuly atyndaǵy oqýshylar saraıynda «Bala Turkvizyon-Qazaqstan» baıqaýynyń aımaqtyq irikteý synynan ótti. Sondaı-aq, respýblıka boıynsha jalpy baıqaýǵa qatysýshy balalardyń sany 2000-ǵa jetti, dep jazady bala.turkvizyon.kz.

«Bala Turkvizyon-Qazaqstan» baıqaýynyń Astana boıynsha jeńimpazy on úsh jasar Dılnýr Birjanova dep biraýyzdan sheshildi. Erekshe daýysty qyz Qaırat Baekenov, Marjan Arapbaeva bastaǵan qazylar alqasyn bir kóregennen baýrap aldy.

Dılnýra kóp balaly úıden shyqqan: úsh sińlisi men bir inisi bar. Anasy Roza Birjanovanyń aıtýy boıynsha, qyzy úsh jasynan bastap án sala bastaǵan. Ákesi gıtarada oınaýdy úırene bastaǵan kezde, qyzy daýys yrǵaǵymen ándete bastaǵan. Sol kezden bastap ata-ana qyzynyń mýzykalyq qabiletiniń bar ekenin baıqaǵan. Sodan keıin, mekteptegi án sabaǵynan beretin ustazy da qyzdyń erekshe daýsyn baıqap, bolashaǵynan zor úmit kútken eken. Qazirgi tańda Dılnýra vokaldan birneshe ustazdan dáris alyp, fortepıanoda oınaıdy. Oǵan barlyq mýzykalyq janrlar unaıdy jáne Roza Rymbaeva, Lara Fabıan, Anı Lorak, Marjan Arapbaeva men Qaırat Baekenovty úlgi tutady. Bos ýaqytynda kitap oqyǵandy jaqsy kóredi. Ónerli qyzdyń basty armany - qaıyrymdylyq kontsert beretin tanymal aktrısa ári ánshi ataný.

Dılnýr Birjanova 13 tamyz kúni aımaqtyń barlyq jeńimpazdarymen birge Almatydaǵy «Juldyzdy úıge» ornalasady. «Juldyzdy úıde» olar eki apta boıy tamyzdyń 16-17 kúnderi Astanada ótetin jáne «Habar» telearnasynyń tikeleı efırinde kórsetiletin baıqaýdyń jartylaı fınalyna daıyndalady.