«Bala Turkvizyon Qazaqstan» baıqaýynyń Aqtóbe oblysyndaǵy jeńimpazy anyqtaldy
ASTANA. QazAqparat - Aqtóbe qalasynda, Ǵazıza Jubanova atyndaǵy oblystyq fılarmonııada «Bala Turkvizyon» Halyqaralyq balalar áni baıqaýynyń Ulttyq irikteý kezeńi ótkizilip, aımaqtyq jeńimpazy anyqtaldy, dep habarlady bala.turkvizyon.kz.
Aqtóbe aımaǵy Ulttyq irikteý ótken onynshy aımaq boldy. Jeńimpaz «Bala Turkvizyon-Qazaqstan» Ulttyq irikteýiniń 16-17 qyrkúıek kúnderi Astanada ótetin jartylaı fınalyna joldama alady. 18 shilde kúni jalpy baıqaýǵa qatysýshy ónerpazdardyń sany 1 500-ge jetti. Qazylar alqasy aımaqtyq irikteýdiń jeńimpazy dep, bir aýyzdan, erekshe kózge túsken, 12 jastaǵy daryndy bala Satıev Rahman dep sheshti. Aýylda jańa mektep salynyp jatqan kezde, balanyń jańadan kelgen ustazy Balagúl apaı shákirtiniń ánge degen qabiletin birden baıqap, ata-anasyna Rahmandy án úıirmesine berýdi suraıdy. Sodan, ánshi bala Aqtóbedegi mýzykalyq mekteptiń vokal synybyna túsedi. Bir jyldyń ishinde Rahman birneshe qalalyq jáne respýblıkalyq baıqaýlardyń Gran-prı ıegeri atanyp úlgerdi. Bul jetistigine qarap, mektep basshylyǵy daryn ıesin birinshi synyptan úshinshi synypqa aýystyrýdy jón kórdi. Odan bólek jeńimpaz basqa balalar sııaqty fýtbol oınaýdy jaqsy kóredi. Sýret salý jáne qolónermen de kásibı túrde aınalysady. Biraq, bala tanymal mýzykant bolǵysy keledi jáne ata-anasy da bul oıyn quptaıdy. Tamyz aıynyń ortasynda Rahman Satıev Almatyǵa «Juldyzdy úıge» jol tartady. Tálimgerimen eki aptalyq daıyndyqtan keıin, ózine arnaıy jazylǵan jańa ándi baıqaýdyń jartylaı fınalynda oryndaıdy.
Ár aımaq óz ereksheligimen este qaldy. Aqtóbelik ónerpazdar baıqaýǵa shyǵarmashylyq jaǵynan jaqsy daıyndalǵandaryn kórsetti. Olar ártúrli baǵyttaǵy, qazaq, qytaı, aǵylshyn, orys, túrik, ýkraın jáne ıtalıan tilderindegi ánder toptamasyn oryndady. Aqtóbe oblysynan úzdikti anyqtaýǵa tálimger ári jeńimpazdyń bolashaq prodıýseri Nurbolat Abdýllın ózimen birge tanymal sazger Pavel Lı men ánshi Jasulan Januzaqovty ala keldi. Dástúr boıynsha barlyq jas órender tirkelýden keıin fleshmobqa qatysyp, kúndeliktiń túsirilimine atsalysyp, ánshilermen birge bı bılep, birge kóńil kótere bildi.
