«Bala Turkvision» baıqaýynyń qorytyndysy boıynsha qazaq tilinde 16 án jazylady - Á. Nazarbaeva
ALMATY. QazAqparat - «Bala Turkvision Qazaqstan» baıqaýynyń qorytyndysy boıynsha jazylatyn qazaq tilindegi ánder Qazaqstannyń mektepteri men balabaqshalarynda keń nasıhattalady. Bul týraly búgin Almatyda balalar án baıqaýynyń kastınginde «Jandaný álemi» qorynyń jetekshisi Álııa Nazarbaeva málim etti.
«Sizderdiń taza, ásem daýysyńyz otanymyzdyń keń dalasynda shyrqalsyn. Bizdiń baıqaýymyz eldiń tórt oblysynan ulty men jasy ár alýan myńnan astam balanyń basyn qosty. Alda áli on oblys pen qalalar bar», - dedi Á. Nazarbaeva.
«Bala Turvision» halyqaralyq balalar baıqaýynyń ulttyq irikteýi - «Jandaný álemi» qory jobalarynyń biri. Onyń mıssııasy - bilim berý, mádenıet jáne qaıyrymdylyq salalaryndaǵy áleýmettik jobalardy qoldaý men júzege asyrý.
Baıqaýǵa 8-den 13 jasqa deıingi daryndy balalar qatysady. Ulttyq irikteýdiń jartylaı fınaly men aqtyq syny aǵymdaǵy jyly 16-17 qyrkúıekte Astanada ótedi. Jeńimpaz anyqtalyp, ol «Bala Turvision» balalar ánderiniń I halyqaralyq baıqaýynyń grand-fınalynda el namysyn qorǵaıdy.
