Bala tárıbesine qatysty jańa kitap jaryq kórdi
Kitap redaktory Nuraddın Sadyqtyń aıtýynsha, bul eńbekti shyǵarý ıdeıasynyń avtory - advokat Abzal Quspan. «Orhon» baspasynan 2 myń danamen jaryq kórgen bul kitapty daıyndaýǵa qurastyrýshylar 2 jyl ýaqyt jumsaǵan. Onda balalarǵa arnalyp shyǵarylǵan kitaptarda buryn-sońdy basylmaǵan shyǵarmalardy toptastyrǵan. Olardy jınaqtaýda qazaq ǵalymdary men zııaly tulǵalardyń estelikterinde jazylǵan materıaldar, Ǵylym ordasynyń sırek kezdesetin kitaptar murajaıy qorynda saqtalǵan qoljazbalar, sheteldik baspalardan jaryq kórgen zertteý eńbekteri paıdalanylyp otyr.
«Psıholog ǵalymdardyń aıtýynsha, balanyń sanasyna ulttyq, ǵalamdyq deńgeıdegi uǵymdardy sińirý qajet. Besik jyrymen bastalǵan bul hrestomatııaǵa taqpaqtar, sanamaq, ertegiler, jańyltpashtar, suraq-jaýaptar, aq bata, qıssalar, mıfter men ańyzdar, batyrlar jyrlary enip otyr», - deıdi kitapty qurastyrýshylardyń biri Muhıt Tólegenov. Onyń aıtýynsha, zertteý kezinde Qazan tóńkerisine deıingi qoljazbalarǵa kóbirek kóńil bólingen. Sondaı izdenis kezinde olar besik jyrlarynyń jańa nusqasyn tapqan.