Bala taǵamy: BQO-da quny 71 mln teńgeden asatyn 9 konkýrstyń talapqa saı kelmeıtini anyqtaldy

ORAL. KAZINFORM — Bıylǵy 29 qańtarda Syrym aýdanynyń bilim berý bólimi 1-4 synypta oqıtyn 1 248 balany tamaqtandyrý boıynsha 71 mln 720,388 myń teńgege 9 konkýrs jarııalaǵan.  

BQO prokýratýrasynyń baspasóz qyzmetinen málim etkenindeı, konkýrstyq qujattamany zerdeleý kezinde atalǵan bilim berý bólimi ázirlegen as máziriniń sanıtarlyq-epıdemıologııalyq talaptarǵa sáıkes kelmeıtini anyqtaldy.

Atap aıtqanda, belgili bir kúnderde balalardyń kúndelikti ratsıonyna kiretin sút, qant jáne maı jetispegen. Sonymen qatar mázirge 5 komponentten turatyn kúrdeli salat engizilgen, bul Densaýlyq saqtaý mınıstriniń «Qoǵamdyq tamaqtaný obektilerine qoıylatyn sanıtarııalyq-epıdemıologııalyq talaptar» sanıtarlyq qaǵıdalaryn bekitý týraly buıryǵynyń talaptaryn buzý bolyp esepteledi.

— Sondaı-aq mázirde tıisti 200 gramm shyrynnyń ornyna bul sýsynnyń kólemi tómendetip kórsetilgen, ıaǵnı 165 gramm. Syrym aýdany prokýratýrasynyń narazylyǵy boıynsha konkýrstardyń kúshi joıyldy. Memlekettik satyp alý salasyndaǵy zańnamanyń saqtalýyn baqylaý jumystary jalǵasady, — dep habarlady vedomstvodan. 

Eske sala keteıik, budan buryn Batys Qazaqstanda zeınetke shyqqan 5 muǵalimge ótemaqy tólenbegenin jazǵan bolatynbyz.