Bala shetelde tólqujatyn joǵaltsa ne isteý kerek
ASTANA. KAZINFORM – Jazǵy demalys pen shetelge saıahat maýsymynda «Azamattarǵa arnalǵan úkimet» memlekettik korporatsııasy balanyń tólqujaty joǵalǵan nemese urlanǵan jaǵdaıda ata-analar qandaı áreket jasaýy kerektigin túsindirdi.
Memlekettik korporatsııa málimetinshe, Qazaqstannan tys jerge shyǵatyn árbir balanyń jasyna qaramastan jeke tólqujaty bolýy tıis. Ony sábı dúnıege kelgen sátten bastap rásimdeýge bolady.
2026 jyldyń alǵashqy jartysynda ǵana Shymkent qalasynyń Halyqqa qyzmet kórsetý ortalyqtarynda balalarǵa arnalǵan 71 myń sheteldik tólqujat rásimdelgen.
– Eger bala shetelde tólqujatyn joǵaltsa nemese qujaty urlansa, eń aldymen Qazaqstannyń jaqyn mańdaǵy elshiligine nemese konsýldyǵyna júginý qajet. Dıplomatııalyq ókildikte Qazaqstanǵa kedergisiz oralýǵa múmkindik beretin ýaqytsha qujat – elge qaıtý týraly kýálik rásimdeledi. Elge kelgennen keıin jańa tólqujat alý úshin HQO-ǵa júginý qajet, – dedi Shymkent qalalyq fılıalynyń PR-menedjeri Altynaı Tataeva.
Vedomstvonyń málimetinshe, shetelge shyǵar aldynda balaǵa tólqujat rásimdeý úshin turǵylyqty jeri boıynsha kez kelgen HQO-ǵa júginý kerek.
Ol úshin:
-
balanyń týý týraly kýáligi;
-
ata-anasynyń biriniń jeke kýáligi;
-
4 AEK (2026 jyly – 17 300 teńge) mólsherindegi memlekettik bajdyń tólengeni týraly túbirtek qajet.
Ótinish berý kezinde balanyń jáne ata-anasynyń biriniń qatysýy mindetti.
Balanyń tólqujaty 15 jumys kúni ishinde daıyndalady. Qajet bolǵan jaǵdaıda qosymsha aqy tólep, jedel rásimdeýge bolady.
Qujattyń jaramdylyq merzimi balanyń jasyna baılanysty belgilenedi. 12 jasqa deıingi balalarǵa tólqujat 5 jylǵa, al 12 men 16 jas aralyǵyndaǵy jasóspirimderge 10 jylǵa beriledi.
Memlekettik bajdy jetim balalar, múgedektigi bar balalar, ata-anasynyń qamqorlyǵynsyz qalǵan balalar, sondaı-aq «Altyn alqa» jáne «Kúmis alqa» ıegerleriniń balalary tólemeıdi.
Mamandar balanyń syrt kelbeti aıtarlyqtaı ózgergen jaǵdaıda tólqujatty merzimi aıaqtalǵanyn kútpeı-aq aldyn ala aýystyrýǵa keńes beredi. Bul shekaralyq baqylaýdan ótý kezinde qosymsha suraqtardyń týyndaýyna jol bermeıdi.
Aıta keteıik, maýsymda qazaqstandyqtarǵa 269 myńnan astam jeke kýálik pen pasport berildi.
