Bala saýdasyna qatysty Qazaqstanda eki jylda 800 is qaraldy

NUR-SULTAN. QazAqparat – Sońǵy 2 jylda elimizde bala saýdasyna qatysty 800 fakti tirkeldi. Bul jaıynda Májilis depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Jeke sáıkestendirý nómirin tirkeý esebi JSN ulttyq tiziliminde júzege asyrylady jáne jeke tulǵaǵa qatysty málimetter negizinde qalyptasady: tegi, aty, ákesiniń aty, týǵan kúni men jeri, jeke tulǵanyń ómirlik jaǵdaıy (tiri, óli). Saraptama kórsetip otyrǵandaı, qoldanystaǵy esepke alý júıesi árbir balanyń tirshiligin tolyqtaı qadaǵalaýǵa jáne ony quqyqqa qaıshy áreketterden qorǵaýǵa múmkindik bermeıdi. Aıtalyq, sońǵy 2 jylda bala, onyń ishinde jańa týǵan sábı saýdasy faktisi boıynsha shamamen 800 is qaraldy», - dedi Úkimet basshysy jaýabynda.

Onyń atap ótýinshe, osyǵan oraı Úkimet «Otbasynyń tsıfrlyq kartasy» aqparattyq júıesin engizý aıasynda barlyq bala týa salysymen birden JSN berý arqyly esepke alý máselesine qatysty júıeli is-sharalar qabyldap jatyr.

«Búginde «Otbasynyń tsıfrlyq kartasy» memlekettik organdardyń 24 aqparattyq júıesimen yqpaldastyrylǵan. 2022 jyldyń 1 maýsymynan «Otbasynyń tsıfrlyq kartasy» jobasyn barlyq óńirde beıimdeý protsesi bastaldy», - dedi Álıhan Smaıylov.