Bala Qorgau telegram-botyna 500-den astam ótinish tústi
Suraqtardyń basym bóligi otbasyndaǵy janjaldarǵa, balalar men pedagogter arasyndaǵy qarym-qatynasqa, kóp balaly otbasylarǵa beriletin járdemaqylarǵa, býllıng jáne jazǵy demalysty uıymdastyrýǵa qatysty boldy. Ótinish bergenderdiń barlyǵyna túsindirý jumystary júrgizilip, qajetti pedagogıkalyq, psıhologııalyq jáne basqa da kómekter kórsetildi.
Mysaly, ákesinen turmystyq zorlyq-zombylyqqa ushyraǵan balanyń anasynyń ótinishi boıynsha Almaty oblysynda turatyn otbasyna qamqorshylyq organdary, aýdan ákimdiginiń jáne polıtsııa qyzmetkerleri shuǵyl túrde jóneltilip, jaǵdaı baqylaýǵa alyndy.
Taǵy bir jaǵdaı, jas ana telegram-botqa ákesi nemerelerin shetelde turatyn týǵan ákesine jibermeı jatqanyn aıtyp, kómek surady. Máseleni qalaı shesherin bilmegen ana mamandardyń kómegine júgingen. Qamqorshylyq organdary departamenttermen birlesip qajetti sharalar qabyldady. Osydan keıin jas otbasy qaıta qaýyshty.
«Biz ótinish berýshilerdiń suraqtaryna múmkindiginshe jyldam jaýap berýge tyrysamyz. Túsken ótinishter boıynsha ata-analar men balalarǵa quqyqtyq jáne psıhologııalyq kómek jetispeıtinin baıqaýǵa bolady. Árbir ótinishti pysyqtap, qajetti kómek kórsetip, barlyq mán-jaı anyqtalyp, jaǵdaı tolyq sheshilgenshe ár jaǵdaıdy erekshe baqylaýda ustaımyz. Ár ótinish 24/7 formatynda shuǵyl túrde qaralady. Jyldam jaýap bergenimiz úshin oqyrmandardan alǵys hattar da kelip jatady. Telegram-chat balalardyń quqyqtaryn buzý, kámeletke tolmaǵandarǵa qatysty zorlyq-zombylyq nemese qatygezdik kórsetý jaǵdaılaryn jyldam anyqtaýǵa jáne sheshýge kómektesedi», - dedi Balalardyń quqyqtaryn qorǵaý komıteti tóraǵasynyń orynbasary Elına Paýlı.
Telegram-chat arqyly oqýshylar arasyndaǵy býllıng faktisi de anyqtaldy. Bala Qorgau telegram-botyna kishkentaı boıy men erekshe kelbeti úshin synyptastarynyń mazaǵyna qalǵan oqýshydan aqparat tústi. Mamandar balamen jáne onyń synyptastarymen áńgimelesti jáne másele sheshildi.
«Balalarǵa psıhologııalyq qoldaý qajet. Kóptegen ata-ana jumystan qoly bosamaıdy jáne balalaryna kóp ýaqyt bóle bermeıdi. Sol sebepti ata-analardan balalaryna kóńil bólip, áńgimelesýin, olarmen jaqyn bolýyn suraımyz. Osylaısha qaıǵyly jaǵdaılardy boldyrmaýǵa bolady», - dep túsindirdi Elına Paýlı.
Sondaı-aq telegram-chatqa mektepte oqýshylar arasyndaǵy aqsha talap etý jaǵdaılaryna qatysty ótinishter túsedi. Mysaly, telegram-chatqa oblystardyń birinen 11-synyp oqýshysy habarlasty. Komıtet ókilderi oqýshylar arasynda qajetti jumystardy júrgizip, pedagogterdiń nazaryn osy máselege aýdardy. Nátıjesinde bul másele de sheshildi.
Balalardyń quqyqtaryn qorǵaý komıteti ótinish berýshiniń barlyǵyna quqyqtyq jáne psıhologııalyq qoldaý kórsetedi. Bul baǵyttaǵy jumystar jalǵasyn tabady.
