Bala óltirgen qylmysker 33 jyldan keıin tabyldy
ASTANA. 25 mamyr. QazAqparat - Nıý-Iorktiń polıtsııa bólimshesi osydan 33 jyl buryn Itan Petts esimdi alty jastaǵy balanyń joǵalyp ketýine qatysy bar degen kúdikpen bir adamdy qamaýǵa alǵandaryn habarlady, dep málim etti Habar agenttigi.
1979 jyly bul qylmys búkil eldi dúrliktirgen bolatyn. Itan úıine oralmaǵan 25 mamyr - AQSh-ta Ulttyq balalardyń joǵalǵan kúni dep jarııalandy. Sol kúni Itannyń Manhettannyń Soho aýdanynda turǵan ata-anasy uldaryna alǵash ret mektepten óz betimen avtobýspen qaıtýyna ruqsat bergen. Sodan beri qansha izdeý salynǵanmen, ony kórgen adam bolmaǵan. Polıtsııanyń habarlaýynsha, qamaýǵa alynǵan 51 jastaǵy Pedro Ernandes esimdi adam Pettsterdiń úıi mańyndaǵy shaǵyn dúkende jumys istegen eken. Nıý-Iork polıtsııasy basshysynyń sózine qaraǵanda, kúdikti tipti 33 jyl boıy jasyryp kelgen óz kinásin moıyndaǵan. Polıtsııanyń habarlaýynsha, sol kezde 19 jasta bolǵan Ernandes Itandy sýsyn alý úshin dúkenge shaqyryp, artynan tunshyqtyryp óltirip, denesin qoqysqa laqtyryp jibergen.
