Bala mektep jasynan kórkem ádebıetti oqýǵa umtylýy kerek - Ashat Aımaǵambetov
«Halyqaralyq sarapshylardyń aıtýynsha, jetistikterge qol jetkizip, básekege qabiletti ári qazirgi qoǵamda ózara baılanys ornata biletin tulǵa bolyp qalyptasý úshin kitap oqýǵa degen qushtarlyqtyń áseri mol. Kitap oqý saýattylyǵy deńgeıin anyqtaý maqsatynda álemniń kóptegen elderi OECD jáne IEA syndy halyqaralyq salystyrmaly zertteýlerine qatysyp, nátıjelerin qoldanady. PISA zertteýleriniń nátıjeleri boıynsha Qazaqstan oqýshylary oqý saýattylyǵy boıynsha Ekonomıkalyq yntymaqtastyq jáne damý uıymyna múshe elderindegi óz qatarlastarynan edáýir artta qalyp otyr. PIAAC halyqaralyq zertteýiniń qorytyndysy boıynsha elimizdegi 16-dan bastap 55 jasqa deıingi azamattardyń da oqý saýattylyǵy nashar bolyp shyqty. ıAǵnı, ókinishke qaraı, elimizdegi eresek azamattardyń da oqý saýattylyǵy tómen deńgeıde. Bul – búgin ǵana belgili bolǵan problema emes, jyldar boıy qordalanǵan másele», - dep jazdy mınıstr áleýmettik jelidegi paraqshasynda.
Sonymen qatar ol mátindi túsinip qabyldaý máselesine qatysty pikir bildirdi.
«Bizdiń balalarymyz kitapty oqýǵa kelgende jalqaýlyq tanytatyny bir bólek, keıde oqyǵan mátindi nashar túsinip, durys qabyldaı almaıdy. Oǵan qosa taldaý jáne qorytyndy jasaý daǵdylary da aqsap tur. Bul shyn máninde ulttyń básekege qabilettiligine áser etetin úlken problema. Sondyqtan da Ulttyq qoǵamdyq senim keńesiniń otyrysynda Memleket basshysy Qasym-Jomart Toqaev ultymyzdyń oqýǵa qushtarlyǵyn arttyrý úshin tıisti sharalardy qabyldaýdy tapsyrdy. Ol úshin bala mektep jasynan bastap kórkem ádebıetti oqýǵa umtylýy qajet. Biz osy maqsatta jaǵdaı jasaýǵa mindettimiz», - dedi A. Aımaǵambetov.
