Bala kúızeliske túspes úshin ata-ana nege mán berýi kerek

ÓSKEMEN. KAZINFORM – Psıholog Zarına Qaharmanqyzy bala kúızeliske túspes úshin ata-anasy nege mán berýi kerektigin aıtty. 

«Balasyn neshe túrli úıirmelerge aparyp, bos ýaqyt qaldyrmaıtyn ata-analar bolady. Bala - bala bolyp oınaýy kerek. Onyń ár kúnin qatań josparlap, qalypqa salyp qoıǵannan góri onymen emotsııalyq baılanys ornatyp, ártúrli jaǵdaıda qandaı sezimde ekenin suraýyńyz qajet», - deıdi Zarına Qaharmanqyzy.

Sebebi jan men sezim tyǵyz baılanysty, sezimderin ajyrata alǵan bala eresek ómirinde sonyń negizinde durys sheshim qabyldaı alady.

«Mysaly, «Myna dosymnyń janynda men ózimdi kem sanaımyn, ol meni kóp keleke etedi. Onyń qasynda kóńilsiz sezimge bólenemin. Al myna dosym men sııaqty armandaıdy, aldyna maqsat qoıady. Onyń qasynda boıymdy shabyt bıleıdi. Demek, men ekinshi dosymmen jaqynyraq aralasýym kerek» degen sııaqty boıyn bılegen sezimge qaraı sheshim qabyldaıdy. Qazirgi qoǵamda ómir súrip jatqan balalardyń basym bóliginde bári bar: úı de, kıim de, tamaq ta, aqsha da, biraq ata-analary jumysbasty, sol sebepti aralarynda emotsııalyq baılanys joq», - deıdi psıholog.

Onyń aıtýynsha, sondyqtan bala kúızeliske túsip ketedi. Onyń aldyn alý úshin qansha jumysbasty bolsańyz da balaǵa kúnine jarty saǵat bolsyn sapaly ýaqyt bólip, áńgimelesip, sezimderin surap otyrý kerek.