Bala kútimine beriletin aı saıynǵy tólemderdiń ortasha mólsheri qansha
ASTANA. KAZINFORM — Jyl basynan beri memlekettik járdemaqylarmen, sondaı-aq Memlekettik áleýmettik saqtandyrý qorynan, balany bosanýǵa jáne bala 1,5 jasqa tolǵanǵa deıin onyń kútimine baılanysty tólemdermen jalpy somasy 506,7 mlrd teńgege 408,5 myń adam qamtyldy.
Al bala týǵanda beriletin járdemaqyny 2025 jyldyń basynan bastap respýblıkalyq bıýdjetten barlyǵy 36,4 mlrd teńge somaǵa 201,7 myń adam qamtyldy, onyń ishinde shilde aıynda 5,9 mlrd teńge somasyn 32,4 myń adam aldy. Bul járdemaqyǵa bala týǵan, asyrap alǵan, sondaı-aq qamqorlyqqa alǵan balalary bar elimizdiń azamattary, qandastar, sondaı-aq Qazaqstanda turaqty turatyn sheteldikter úmitker bola alady.
— Balaǵa kútim jasaıtyn adam mindetti áleýmettik saqtandyrý júıesine qatysýshy bolyp tabylmaǵan jaǵdaıda týǵan, asyrap alǵan, sondaı-aq qorǵanshylyqqa alǵan balalary bar, eger olar basqa ata-ananyń otbasynda eskerilmese, ógeı balalary bar adamdardyń (otbasylardyń) bala kútimine baılanysty járdemaqy alýǵa quqyǵy bar. Esepti kezeńde 1,5 jasqa tolǵanǵa deıin bala kútimi boıynsha járdemaqymen 25,4 mlrd teńge somasynda orta eseppen 124,1 myń adam qamtyldy, onyń ishinde shilde aıynda 3,7 mlrd teńge somasyn 125,8 myń adam aldy, — delingen Eńbekmıni habarlamasynda.
Bala týýyna jáne bala kútimine arnalǵan memlekettik járdemaqylardyń mólsheri respýblıkalyq bıýdjet týraly zańmen tıisti qarjy jylyna bekitilgen aılyq eseptik kórsetkishke baılanysty belgilenedi. 2025 jyldyń basynan bastap memlekettik járdemaqylardyń mólsheri 6,5%-ǵa ındekstelgen.
Bıylǵy bala týýyna arnalǵan járdemaqy mólsheri:
— birinshi, ekinshi, úshinshi balaǵa — 38,0 AEK nemese 149 416 teńge;
— tórtinshi jáne odan keıingi balalarǵa — 63,0 AEK nemese 247 716 teńge.
Bala 1,5 jasqa tolǵanǵa deıin onyń kútimine baılanysty tólenetin járdemaqy aı saıyn kelesideı mólsherde tólenedi:
— birinshi balaǵa — 5,76 AEK nemese 22 648 teńge;
— ekinshi balaǵa — 6,81 AEK nemese 26 777 teńge;
— úshinshi balaǵa — 7,85 AEK nemese 30 866 teńge;
— tórtinshi jáne odan keıingi balalarǵa — 8,90 AEK nemese 34 995 teńge.
Budan basqa jumys isteıtin azamattarǵa júktilikke jáne bosanýǵa, jańa týǵan balany (balalardy) asyrap alýǵa baılanysty kirisinen aıyrylǵan jaǵdaıda MÁSQ-tan tólenetin áleýmettik tólem júktiligi jáne bosanýy boıynsha berilgen demalystyń barlyq kúnderine taǵaıyndalady. Tólem mólsheri júktiligi jáne bosanýy boıynsha ýaqytsha eńbekke jaramsyzdyq paraǵy berilgenge deıingi sońǵy 12 aı ishinde MÁSQ-ǵa áleýmettik aýdarymdar júrgizilgen ortasha aılyq kiriske jáne eńbekke jaramsyzdyq kúnderiniń sanyna baılanysty bolady.
— Atalǵan birjolǵy tólemdi jyl basynan beri jalpy somasy 190,7 mlrd teńgege 133,6 myń adam aldy, onyń ishinde shilde aıynda 24 mlrd teńge somasyna 21,8 myń adam aldy. 2025 jyldyń 7 aıynda taǵaıyndalǵan tólemniń ortasha mólsheri 1 523 093 teńge boldy.
Sondaı-aq MÁSQ-dan bala bir jarym jasqa tolǵanǵa deıin onyń kútimine baılanysty kirisinen aıyrylý jaǵdaıy boıynsha aı saıynǵy áleýmettik tólem mindetti áleýmettik saqtandyrý júıesine qatysýshyǵa balanyń týǵan kúninen bastap taǵaıyndalady. Tólemniń mólsheri sońǵy 2 jylda MÁSQ-ǵa áleýmettik aýdarymdar júrgizilgen ortasha aılyq kiristiń 40%-n quraıdy. Eki jáne odan da kóp bala týǵan jaǵdaıda tólem ár balaǵa jeke taǵaıyndalady, — delingen habarlamada.
2025 jyldyń 7 aıynda bul tólem 254,2 mlrd teńgege 150,8 myń adamǵa taǵaıyndaldy. Onyń ishinde tólem shilde aıynda 21,6 myń alýshyǵa taǵaıyndaldy, tólemniń somasy shilde aıynda 36 mlrd teńge. 7 aıdaǵy tólemniń aı saıynǵy ortasha mólsheri — 88 766 teńge.
Aıta ketelik kópbalaly otbasylar men marapattalǵan analarǵa qandaı járdemaqy tólenetini týraly jazǵan edik.