Bala kútimi: Er adam dekretke shyqsa da, járdemaqy áıelge berilmek
ASTANA. KAZINFORM — Qazaqstanda bala kútimine baılanysty áleýmettik tólem otbasynda anasy men ákesi birge turǵan jaǵdaıda anasyna taǵaıyndalady. Al balany jalǵyz tárbıelep otyrǵan er adam qorǵanshy mártebesine ıe bolsa, járdemaqy alý quqyǵy saqtalady.
— Ana men balaǵa qoldaý kórsetý úshin beriletin bul tólem ákege emes, anasyna taǵaıyndalady. Er adam bala kútimine baılanysty demalysqa shyǵa alady, biraq áleýmettik tólemdi ózi emes, jubaıy alady, — dep jaýap berdi Eńbek mınıstri Asqarbek Ertaev tilshiler suraǵyna.
Memlekettik áleýmettik saqtandyrý qorynyń basqarma tóraǵasy Almas Qurmanov bul tártiptiń jynysyna qaraı kemsitý bolyp sanalmaıtynyn atap ótti.
Onyń túsindirýinshe, «Erler men áıelderdiń teń quqyqtary men teń múmkindikteriniń memlekettik kepildikteri týraly» zańnyń 4-babyna sáıkes, ana men balany qoldaýǵa baǵyttalǵan sharalar jynystyq belgi boıynsha kemsitýge jatpaıdy.
— Er adam Eńbek kodeksine sáıkes bala kútimine baılanysty demalysqa shyǵa alady. Al áleýmettik tólem anasyna taǵaıyndalady. Biraq er adam balany jalǵyz tárbıelep, qorǵanshy bolsa, tólem alý quqyǵy bar. Munda biz tólem alý múmkindigin shektemeımiz, — dedi Almas Qurmanov.
Sonymen birge, jańa tártip boıynsha ana sábıi 1,5 jasqa tolǵansha jumysqa shyqsa da, áleýmettik tólem tolyqqandy 1,5 jyl boıy beriledi.
— Jumysqa shyqqan áıeldiń izin baqylap, sońynan eshkim túspeıdi. Qazir biz Memlekettik kirister komıtetine tıisti málimetterdi joldap, basqa da sharalardy qolǵa alamyz. Endi ananyń jumysqa shyqqany týraly buıryqty suratyp, sonyń negizinde tólem toqtatylmaıdy. Ana sábıi 1,5 jasqa tolǵansha járdemaqysyn tolyq alady, — dep túsindirdi A. Qurmanov.
Aıta keteıik, balasy 1,5 jasqa tolmaı jumysqa shyqqan analardyń járdemaqysy tolyq saqtalady. Bul ózgeris áıelderdiń jumysqa oralýyna kedergi keltiretin shekteýdi joıýǵa baǵyttalǵan.
Sonymen qatar, járdemaqy úshin ajyrasýdyń aldyn alý úshin bólek turatyn ata-analar da balanyń otbasy quramyna engiziledi.
Eńbek mınıstri 36 járdemaqynyń 14 túrine ǵana muqtajdyq krıterııi engiziletinin aıtty.
