Bala kúnimnen forma kıip, áskerı bolýdy armandadym - tergeýshi qyz
KÓKShETAÝ. QazAqparat - «Bala kúnimnen forma kıip, áskerı bolýdy armandadym. Meni sol armanym adastyrmaı, polıtsııa salasyna alyp keldi». Kókshetaý qalalyq polıtsııa basqarmasynyń tergeýshisi, polıtsııa qyzmetkeri Aıǵanym Aqpaeva osylaı deıdi, dep habarlaıdy QazAqparat tilshisi.
Aıǵanym Qaıratqyzy 1997 jyly 12 aqpanda Aqmola oblysy Zerendi aýdany Vıktorovka aýylynda dúnıege kelgen.
2019 jyly M.S.Nárikpaev atyndaǵy KazGıÝÝ-dy «quqyq qorǵaý qyzmeti» mamandyǵy boıynsha bitirdi.
2020 jylǵy 13 aqpanda Kókshetaý qalalyq Polıtsııa basqarmasynyń múliktik qylmystar jónindegi bólimine qyzmetke ornalasty. QR Іshki ister mınıstrligine qarasty M.Esbolatov atyndaǵy Almaty akademııasynda alǵashqy daıyndyqtan ótti.
«Bala kúnimnen forma kıip, áskerı bolýdy armandadym. Meni sol armanym adastyrmaı, polıtsııa salasyna alyp keldi. Polıtsııa jumysy aýyr ári jaýapty. Soǵan qaramastan, bul qyzmet isteý ózime unaıdy, mamandyǵymmen maqtana otyryp, qoǵamdyq tártip saqtaýdy qalyptastyrý jolynda bar kúshimdi sarp etýge ázirmin. Eńbek jolymdaǵy meniń ustazym - polıtsııa kapıtany Edil Jumajanov qyzmet barysynda únemi óziniń ómirden alǵan tájirıbesin bólisip otyrady», - deıdi Aıǵanym Aqpaeva.
Keıipkerimiz qazirgi tańda ójet minezine tán polıtsııa salasynyń ystyq-sýyǵyna tózip, tájirıbesin shyńdap keledi. Jaqynda Dınara Shahmanova esimdi turǵyn onyń atyna Kókshetaý qalalyq polıtsııa basqarmasyna Alǵys hat joldapty. Onda Aıǵanymnyń qylmystyq isterdi tergeýdegi kásibı sheberligi aıtylǵan.
«Zardap shekken adamdarǵa kómektesip, qylmystyń izin sýytpaı qylmyskerdi ustaý polıtsııa qyzmetkeriniń mindeti. Maǵan aldanǵan ájeler, atalar nemese ınternet-alaıaqtyqtan zardap shekken adamdar qońyraý shalǵanda, men jas urpaqtyń ókili retinde olardyń ornyna ózimdi qoıyp kóremin, olarǵa kómekteskim keledi»,-dep bólisti Aıǵanym.
Kún men túndi talǵamaıtyn onyń jumysy elenip, tergeý sharalaryn júrgizýdegi uqyptylyǵyn áriptesteri de oń baǵalap otyr.
«Aıǵanym Aqpaeva ózin óte saýatty qyzmetker retinde kórsete bildi, ózine júktelgen tapsyrmany ýaqtyly ári sapaly oryndaıdy» – deıdi Kókshetaý qalalyq polıtsııa basqarmasynyń bastyǵy, polıtsııa maıory Qasym Japarov.
