Bala quqyqtary jónindegi ombýdsmen ózge óńir azamattaryn onlaın qabyldaý júıesin engizbek

ALMATY.QazAqparat - QR Bala quqyqtary jónindegi ýákili Sáýle Aıtpaeva azamattardy beıne konferentsııa arqyly qabyldaý tásilin engizedi. Bul týraly jańa ombýdsmen Almatyda pedagogtar men memlekettik emes organdardyń ókilderimen kezdesýinde aıtty, dep habarlaıdy QazAqparat tilshisi.

«Jyldyń ár toqsanynda Bilim mınıstrligi men Densaýlyq saqtaý mınıstrligi birigip azamattardy vıdeokonferentsııamen qabyldaımyz. Bul qyzmetke júgingen adamdardyń sanyna baılanysty ótkiziledi.  Jáne beınekonferentsııaǵa memlekettik emes organdar qatystyrylady. Endi azamattarǵa júzdegen kılometr asyp, jolǵa shyǵyndanýdyń qajeti joq.  IT-tehnologııalar - birinshi kezekte  qoldanatyn quralymyz. Alǵashqy qabyldaý kúzden bastalady», - dedi S. Aıtpaeva. 

Eske sala ketsek, QR BǴM basshysy  Erlan Saǵadıev pen bala quqyqtary jónindegi ombýdsmen Sáýle Aıtpaeva muǵalimder men bala quqyqtarymen aınalysatyn memlekettik emes organdardyń ókilderimen kezdesý ótkizgen bolatyn.